5 сыныпқа арналған танысу сабағы психология материалы

«5-сынып деген не?» атты психологиялық танысу сабағы

Мақсаты: 5-сынып оқушыларының жаңа ортаға жақсы бейімделулеріне, мұғалімдерін танып, біліп, олармен жақсы қарым-қатынас орнатуына жағдай жасау. Оқушылардың өздеріне сенімділіктерін, білім алуға деген құштарлықтарын арттыру.

Құрал-жабдықтар: музыка құралдары, сурет салу құралдары, стикер, ватман.

Әдістері: топтық жұмыс, тренингтер, сұрақ-жауап.

Қатысушылар: 5-сынып оқушылары, сынып жетекшілері, пән мұғалімдері.

Барысы:

«Танысу» тренингі

Мақсаты: Оқушы мен мұғалім бір-бірімен танысып, бір-бірін жақын тануға мүмкіндік алады.

Берілген стикерге өзінің визиткасын жасайды. Онда аты-жөні, өз бойындағы ерекше қасиеті жазылады: мысалы, Гайнуллиева Дильназ – домбырашы, биші; Жанат Аккалиевна – музыка пәні мұғалімі, әнші.

«Кім нені жақсы көреді?» жаттығуы

Мақсаты: Көңіл-күйлерін көтеріп, бір-біріне жақындастыра түседі, арадағы алшақтықты жоюға жағдай жасайды.

Тәттіні жақсы көретіндер бір қадам алға

Мысығы барлар оң қолдарын көтереді

Футболды жақсы көретіндер сол аяғын көтеру керек

Баскетболды жақсы көретіндер бастарын ұстауы керек

Туған күнге барғанды жақсы көретіндер тізерлеп отыруы керек

5-сыныпта оқитындар бір-бірімен қол ұстасу керек.

5-сыныпқа сабақ беретіндер белдерінен ұстасу керек.

5-сыныпта оқитындар «Біз 5-сыныпта оқимыз!» деп айқайлауы керек.

5-сыныпқа сабақ беретін мұғалімдер «Біз 5-сыныпқа сабақ береміз!» деп айқайлауы керек.

«Пәндер шеруі» жаттығуы

Мақсаты: 5-сыныпта оқылатын жаңа пәндер туралы мағлұмат алады.

Әр пән мұғалімдерінің қасына 2-3 оқушыдан бөлінеді. Әр топқа өз пәндерінің суреті жапсырылған ватман беріледі. Пән мұғалімдері оқушылармен бірігіп, 5-сыныпта өз пәні бойынша нені оқып, нені үйренетіндері туралы қоллаж жасап, соңынан қорғайды.

«Көңілді би» жаттығуы

Мақсаты: мұғалімдер мен оқушылардың қарым-қатынастары жақсарып, бір-біріне деген сенімдері артады, көңіл-күйлері реттеледі.

Музыка әуенімен бәрі бірігіп би қимылдарын жасайды.

«Уәде беру парағы»

5-сынып оқушыларының уәде беру парағын қабылдауы және сол параққа ұстаздарын куәландырып қол қойғызуы.

ЖОББ Қ.Сәтбаев атындағы мектебі

5-сынып оқушысының уәде беру парағы

Мен, __________________________, төменде көрсетілген сынып жетекшіме және ұстаздарыма 5-сыныпта сабақтан себепсіз қалмауға, сабақ үстінде әдептілік пен тәртіпті сақтауға, ұстаздарым түсіндірген сабақты мұқият тыңдап, санама құюға, үй тапсырмаларын мұқият орындап, сынып ұжымында болатын шараларға белсенді қатысуға, сыныптас достарыммен тату болуға, сынып жетекшіммен және басқа да ұстаздарыммен жақсы қарым-қатынаста болуға уәде беремін.

5-сыныпта мені білімге баулып, тәрбиелейтін қолдаушы ұстаздарым:

Математика

Валиева Ү.Д.

Орыс тілі

Мендыгалиева З.А

Қазақ тілі

Нусанова Н.И.

Дене шынықтыру