Әл-Фараби университетіндегі инновациялар туралы мақала

Әл-Фараби атындағы Қазақ ұлттық университеті – инновациялық болашақ пен жетістіктер айнасы

Осы бір тоқсан жылдық тарихы бар, еліміздің сан мыңдаған жастарына сапалы білім мен терең тәрбие берген, көптеген көрнекті әрі ел мақтаныштары болған тұлғалардың білім бесігіне айналған – Әл-Фараби атындағы Қазақ ұлттық университетінде білім алып келе жатқаныма биыл бесінші жыл. Бұл – мен үшін зор мақтаныш әрі үлкен жауапкершілік. Әлемнің екінші ұстазы атанған ұлы бабамыз Әбу Насыр Әл-Фарабидың есімін иеленген бұл оқу орны – тек еліміздің емес, бүкіл түркі дүниесінің рухани және ғылыми орталығы десе артық айтқандық емес.

Қазақ Ұлттық университеті – білім мен ғылымның шынайы ордасы. Осы қасиетті шаңырақтан қанат қаққан түлектер бүгінде еліміздің түрлі салаларында табысты еңбек етіп, өздерінің кәсіби жетістіктері арқылы қоғамның дамуына үлес қосып отыр. Университет қабырғасынан түлеп ұшқан әрбір түлек – ел ертеңінің жарқын болашағы. Бұл оқу орнында алған білім мен қалыптасқан тәрбие – өмірлік бағыт пен болашаққа деген сенімділіктің мықты іргетасы.

Қазіргі таңда әлемдік деңгейде білім беру жүйесі тек академиялық біліммен шектелмейді. XXI ғасыр адамына қойылатын талаптар мүлде жаңа сипатта. Ол жан-жақты дамыған, эмоционалды әрі әлеуметтік интеллектісі жоғары, қарым-қатынас мәдениетін жетік меңгерген, заманауи технологияларды игерген, сыни ойлай алатын тұлға болуы тиіс. Сондықтан да қазіргі білім беру жүйесі тұлғаның интеллектуалдық әлеуетімен қатар, оның эмоциялық, психологиялық даму деңгейіне де аса назар аударады. Өйткені қазіргі еңбек нарығында тек кәсіби білім ғана емес, сонымен қатар жұмсақ дағдылар (soft skills) – яғни адамдармен тиімді байланыс орнату, эмоцияны басқару, ұжымда жұмыс істей алу қабілеттері аса жоғары бағаланады.

Магистратура деңгейінде білім алып жүрген біздер үшін мұндай дағдыларды меңгеру – болашақ кәсіби жолымыздың табысты болуының кепілі. Университетімізде магистранттардың ғылыми-педагогикалық бағытта жан-жақты дамуына үлкен мүмкіндік жасалған. Оқу бағдарламасының маңызды бөлігі – педагогикалық тәжірибе. Бұл тәжірибе бізге тек алған теориялық білімімізді қолдану ғана емес, сонымен қатар шынайы өмірдегі оқу процесіне енуге, оқытушы мен студент арасындағы қарым-қатынастың маңызын түсінуге мүмкіндік береді.