Әлеуметтік желінің пайдасы мен зияны туралы мақала

Әлеуметтік желі: пайдасы мен зияны

Қазір бәріміз әлеуметтік желіде отырамыз. Instagram, TikTok, WhatsApp – күнде қолданып жүрген қосымшалар. Таңертең оянғанда ең бірінші телефонды қолымызға аламыз. Біреу сторис салыпты ма, кім не жазыпты деп қараймыз. Бұл – қазіргі заманның әдеті. Бірақ әлеуметтік желінің пайдасы ғана емес, зияны да көп.

Көп адам “тек бір минутқа ғана кіріп шығамын” дейді де, бір-ақ қараса, екі сағат өтіп кетеді. Осылай уақыт босқа кетеді. Ал сабақ, үй тапсырмасы, пайдалы істер кейінге қалады. Тағы бір жаман жағы – адамның көңіл-күйі бұзылуы. Әлеуметтік желіде бәрі бақытты, бәрінің өмірі тамаша сияқты көрінеді. Қымбат киім, шетелге саяхат, мінсіз бет, мінсіз дене – бәрі идеал. Ал өзіңе қарап, көңілің түсіп кетеді. Неге менде олай емес деп ойлайсың. Бірақ шын мәнінде, көп нәрсе жалған немесе тек жақсы сәттер ғана көрсетіледі.

Сосын желіде ұзақ отыру – денсаулыққа зиян. Көзіміз ауырады, ұйқы бұзылады. Түнде ұйықтамай, телефон шұқылап жататындар көп. Ұйқы жетпейді, таңертең мектепке баруға шаршап тұрасың. Сонымен қатар, кибербуллинг деген бар – біреулер жаман пікір жазып, ренжітіп жатады. Бұл адамның өзін бағалауына, сеніміне қатты әсер етеді. Кейде жалған ақпараттар тез тарайды, неге сену керек екенін білмей қаласың.

Сондықтан әлеуметтік желіде отыруды шектей білу керек. Ол бізге пайдалы болсын десек, уақытты жоспарлап, тек керегін көруіміз керек. Ең бастысы – шынайы өмірді ұмытпау. Нағыз достар, нағыз эмоциялар экранның ар жағында емес, дәл қасымызда.