Алматының жас жазушысы байқауы туралы мақала 11 сынып

«Алматының жас жазушысы – 2025» байқауы мәресіне жетті

Алматыда алғаш ұйымдастырылған «Алматының жас жазушысы – 2025» қалалық байқауы ерекше серпінмен өтті. Байқау ережесіне сәйкес, негізгі мақсат – балалар мен жасөспірімдер арасында оқу мәдениетін қалыптастыру, шығармашылық қабілеттерін шыңдау және қазақ әдебиетіне деген қызығушылықты арттыру болатын.

Ұйымдастырушылар — Алматы қаласы Орталықтандырылған кітапханалар жүйесі, Қазақстан Жазушылар Одағы және «Өркен» балалар әдебиетін дамыту қоғамдық бірлестігі. Байқау қазақ әдебиетінің көрнекті өкілі Сапарғали Бегалиннің 130 жылдығына орай ұйымдастырылды. Қатысушыларға жазушының шығармаларын оқып, солардың желісі бойынша фэнтези жанрында жаңа әңгіме жазу тапсырылды.

Биылғы байқауға 173 жас қаламгер қатысып, олардың ішінен үздік 20 шығарма іріктеліп алынды. Байқаудың қорытындысы Ұлттық кітап күні қарсаңында Қазақстан Жазушылар Одағында салтанатты түрде жарияланды. Бұл күн жас авторлар үшін ғана емес, олардың ата-аналары мен ұстаздары үшін де үлкен мереке болды.

Марапаттау рәсімінде «Жас дарын» номинациясы бойынша жеңімпаздар мен арнайы сертификат иегерлері анықталды. Жүлделі орындарға ие болғандарға кітап жинақтары, қаламсаптар және естелік сыйлықтар табысталды. Осы сәтті пайдаланып, байқауда үшінші орынды қанжығасына ілген қатысушылардың бірі Әбдірахман Дәулеткелдіұлы Қайратпен кішігірім сұхбат құрдым:

— Сізге бұл байқауға қатысу туралы ой қайдан келді?Жарыс алдында күдік немесе толқу болды ма?

— Бұл байқау туралы алғаш естігенімде, жүрегімде бір күдік ұялады. «Жазушылық — ауыр жол, менікі емес шығар…» деп, ережесін оқи салып жауып қойдым. Бірақ бірнеше аптадан кейін Нұргүл тәтем маған қайта сілтеме жіберіп, «Қатыссаңшы, бұл — керемет мүмкіндік!» деді. Сол сәтте бойымда әлдебір үміт сәулесі пайда болды. «Бәлкім, шынымен де менің жолым осы болар? Бар болғаны өзіммен жастылар қатысады ғой… Неге қорқамын?» — деп, өз-өзіме серт беріп, қатысуға бел будым.

— Әңгіме жазу барысы қалай өтті? Айтарлықтай қиындықтар туды ма?

— Байқау қазақ әдебиетінің ұлы тұлғаларының бірі Сапарғали Бегалиннің 130 жылдығына арналды. Тапсырмасы да ерекше — жазушының екі шығармасын оқып, солардың желісімен фэнтези жанрында әңгіме жазу керек. Аудандық кітапханаға барып, шығармаларын іздедім. Таптым да оқыдым. Тереңіне бойладым. Кейіпкерлердің мінезін, арманы мен болмысын қойын дәптеріме түртіп алдым. Бірақ жазуға отырсам болды — сөз жүрмейді. Уақыт өтіп жатты. Дедлайн жақындап келеді. Шабыт жоқ. Бір күні тауға қарап отырғанымда шабыт келгендей…