Алтын ұядағы алғашқы қоңырау туралы мақала

Алтын ұямыздағы алғашқы қоңырау

Жымыңдап күз келді,

Күліңіз сіз де енді.

Бірінші қыркүйек

Қарсы алшы біздерді!

Кеше ғана жадыраған жазды құшақ жая қарсы алып, мәз-мейрам боп едік. Бүгін жаз да қол бұлғап, есіктен қимай-қимай қарап тұр... Күз бір өзі келген жоқ. Білім күнін ерте келді. Білім күні – барша қазақстандықтар үшін мерейлі мереке, зор қуаныш.

Оқушылардың мектепке қыркүйектің бірінде баруларының себебі: бағзы замандарда бұл күні күздің алғашқы күні ғана емес, күнтізбенің алғашқы күні басталатын болған. 1984 жылдан бастап, «Білім күні» күнтізбеде қызылмен белгіленетін болды.

Гимназиямызда аталмыш мерекеге орай, ұмытылмас мерекелік нөмір дайындады: құлаққа жағымды сөздер, театрландырылған қойылым, би, ән. Биылғы жаңа оқу жылында мектеп табалдырығын аттаған бүлдіршіндердің саны 510-ға жетті. Гимназия директоры Қызылғұлова Ләззат Әбілдақызы биік шыңдарды бағындырып, гимназия мақтанышына айналатын шәкірттеріміздің, ұлағатты ұстаздарымыздың ерен еңбегінің арқасында гимназиямыз қала бойынша үздік үштіктің қатарына, облыс бойынша үздік ондықтың қатарына, республика бойынша үздік жүз мектептің қатарына енгендігін айтып, оқушыларға сәттілік тіледі.

Іс-шара барысында облыстық мәслихат депутаты Саурықов Ерболат Байұзақұлына сөз беріліп, 1-сынып оқушыларына болашақта Қазақстанның көк байрағын биікке көтерер азамат болып өсетіндігіне сенім білдіретіндігін айтты. Алғашқы қоңырау соғылып, оқушылар мерекелік жиыннан кейін сынып сағаттарына қатысып, көтеріңкі көңіл-күймен үйлеріне тарқасты.

МұсабековаМәдина Даниярбекқызы