Алып анадан туады тәрбиелік ток-шоу сценарийі

«Айтуға оңай...» бағдарламасының желісімен

«Алып анадан туады» тақырыбындағы сыныптан тыс шара

1-видео («Айтуға оңай...» музыкасы)

Кім сендерді балалар, сүйетұғын,

Қуанышыңа қуанып, қайғыңа күйетұғын?

Түн ұйқысын төрт бөліп, кірпік қақпай,

Шешең байғұс дамылсыз жүретұғын.

Кім сендерді, балалар, тербететін,

Еркелетіп ойнайтын, сергітетін?

Жалқау болсаң, балалар, жаман болсаң,

Қамқор анаң көз жасын көлдететін.

Қайырлы күн, қадірменді әлеумет! Қызылжар орта мектебінде «Айтуға оңай» бағдарламасы. Бүгінгі біздің тақырыбымыз «Алып анадан туады...» деп аталады.

Әр адам көзін ашып дүниеге келгенде мейірімді, жүрегі жылы жанды көреді. Ол – Ана. Қанаттыға қақтырмай, тұмсықтыға шоқыттырмай бауырына басып, біз үшін шырылдайтын да ана.

Үйдегі алтын қазық – ана. Ал ана ақылды болса, бала дана болады.

Соңғы жылдары түрлі саладағы жетістіктерімен қуантып жүрген дарынды, талантты шәкірттер Қызылжар орта мектебінде көптігіне куә болып жүрміз және мақтанышпен айта аламыз. Атап айтатын болсақ, олимпиада жеңімпаздары, жас ақын-жазушылар, көркемсөз, ән-күй, би, қолөнер, спорт шеберлерінің жетістіктерін естігенде төбеміз көкке екі-ақ елі жетпей тұрады.

Бұл тек бір ғана баланың жетістігі емес, тұтас бір ұлттың арманы мен үмітінің орындалуының алғашқы баспалдақтарындай болып көрініп, жүрегімізді жылытып, жанымызды жадыратып жүр.

Олай болса, алғашқы кейіпкеріміз туралы суреттер сыр шертеді, тамашалайық. (2-слайд Иманя).

Ана – үйдің берекесі. Әрбір адамның жарық дүниедегі жанашыры да осы – ана. Сондай аналардың бірі –Тілеужанова Жанар ханым және біздің мақтанышымыз, 6 «ә» сынып оқушысы Иманя.

Сұрақ: Қош келдіңіз. Әр баланың өмірге келуі – анасының жеңісі. Ол – аналарымыздың өмір, ұрпақ, бақыт үшін күресі. Сәбидің күлкісі, балдай тәтті қылығы, былдырлаған тілі, ер жетіп, азамат болуы, елге қызмет етуі – ана үшін өз өмірінен де қымбат дүние. Осыған келісесіз бе?

Сұрақ: Иманя сіздің тұла бойы тұңғышыңыз ғой, ия. Ана болу бақытын осы қызыңыз арқылы білдіңіз. Ендеше, сол сезіміңізді сөзбен жеткізіп беріңізші.

Сұрақ: Иманя үйде қандай бала?

Иманяға сұрақ: Анаң сені қалай еркелетіді?

Анаңды ренжітіп алатын кезің бола ма? Ондай кезде қалай татуласасың?

Сенің озат, жан-жақты, белсенді оқушы болып жүргеніңе анаңның қандай да бір қатысы бар ма?

Сонау бір замандары Абайдай алыбымыз Зере, Ұлжан аналардың игі ықпалымен халқымызың мол рухани мұрасының тереңіне бойласа, Шоқанның Шоқан болуына Айғаным әженің қосқан үлесі де әмбеге аян. Ал Қажымұқан бабамыздың жаһанды жалпағынан басқан даңқты жолының Кәбира, Айсара аналардың бесік жырынан бастау алып жатқаны шүбәсіз. Сонау бір замандары деуіміз жайдан-жай емес!..

Қазіргі таңда кейбір көкек-аналардың өзегін жарып шыққан баласын өзгеге қиып, енді біреулері бейкүнә сәбиді көпе-көрнеу қоқысқа тастап, ал бәзбіреулерінің өмірге келер-келместен қорғансыз перзентін өлімге беріп жатқанын естіп-білгенде, «Бесік жырын айта алмайтын аналардың, немерелеріне ертегі айта алмайтын әжелердің көбеюінен қорқамын» деп Б.Момышұлының қауіптенуінің негізсіз болмағанына көз жеткіземіз. Осы арада қара сөздің қас зергері Мұхтар Әуезовтің «Ел болам десең, бесігіңді түзе» деген тағылымын еске алып, қайран қалмасқа лажың қалмайды. Шынымен де, тәрбие тал бесіктен, бесікті тербеткен анадан бастау алады екен ғой...

Құрметті көрермендер, сіздерге тәлім-тәрбиесі мен таланты қатар келіскен тағы бір-екі оқушымызбен танысудың орайы келіп тұр. Оларды ортаға шақырмас бұрын экранға қарайықшы. (3-слайд Қайырбек пен Нұрдәулет)

Мектебіміздің үздік оқушысы, талапты да талантты жас ақындарымыз Қонақбаев Қайырбек пен Қабасов Нұрдәулетті қарсы алыңыздар.

Сұрақ: 1.Он шақты жылға шегініс жасайықшы. Алғаш бірінші сыныпқа барғандарың естеріңде ме? Аналарың қалай қамқорлық жасаушы еді?

2.Кішкентайларыңда аналарың сендерге ертегі, аңыздар айтушы ма еді?

3. Аналарыңды қалай қуантасыңдар?

Дәл осы тұста мына бір бейне сюжетті тамашалайықшы (4-видео Нұрдәулет-Семей).

Сұрақ: Нұрдәулет, бұл қандай сайыс, қай кезде өтті, қай жер болды? Қандай олжамен оралдың?

Жүргізуші: Қайырбектің де биылғы оқу жылының өзіндегі жетістіктері өте көп. Ол,ақындағымен қатар, оқуда озат оқушы. Жастар арсындағы пікірталас сайыстарына, «Жайдарман» ойндарына белсене атсалысып жүреді. Тарих пәні бойынша олимпиадаға даярлап жүрген ұстазының пікірін тыңдайық. (5-видео Қайырбек туралы Эльмира апай)

Сұрақ: 1.Тарихтан олимпиадаға қай сыныптан бастап қатыстың?

2.Қандай жетістікке жеттің?

3.Аналарыңа арнаған жыр шумақтарың бар екен...

4.Ақындық қасиет сендерге қалай, қайдан, қай кезден бастап келді?

Осы бағдарламаға дайындық кезінде біз мектеп мұғалімдері мен оқушыларынан сауалнама алған болатынбыз. Дарынды балалар туралы олардың ой-пікірі қандай екен? (6-видео сауалнама)

Сұрақ: Сауалнамадан байқағандарыңыздай, кейбіреулер дарын мен талант туа бітеді десе, енді біреулердің ойынша тұқым қуалау арқылы беріледі екен. Біздің кезекті қонағымыз биология пәнінің тәжірибелі ұстазы Әбдіхалықов Қалыбек ағайды қарсы алыңыздар.

Сұрақ: 1.Қалыбек ағай, дарындылық, таланттылық дегеніміз не?

2.Ол балаға қалай беріледі?

3.Тәрбиенің бұл арада қандай да бір рөлі бар деп ойлайсыз ба?

Біз ортамызға Қызылжар орта мектебінің медбикесі Базарова Света апайды шақырып отырмыз. Ондағы ойымыз баланың дарынды, талантты болып өсуіне, мүмкін, ана сүтінің тигізер ықпалы шығар, бар болса қаншалықты деңгейде? Осы арасын медициналық тұрғыдан маманнан сұрап білейік.

Сұрақ: Света апай, табиғаттың ең ғажап сыйы, дүниедегі ең тәтті де дәмді тағам – ана сүті екені баршамызға аян. «Мал аласы сыртында» демекші, уызына жарыған қозының күйі жақсы, қоңды болатынын білеміз. Ал аласы ішіндегі адам баласының уызына жарығанының, яғни ана сүтін мейірі қана ішкенінің оның ерекше қабілетті болуына қаншалықты пайдасы бар?