Ана тілім болашағым ертеңім тақырыбындағы мақала

Ана тілім – болашағым, ертеңім

Кешегі ұлы ақын-жазушыларымыздың сенімін ақтап, тіл бірлігін жалғастыруда барлық күш-жігер, жауапкершілік алдымен бүгінгі жастарымызға түсетіндігі айдан анық емес пе? Өзгелерге еліктеп, өзінің ана тілін менсінбей жүрген жастарымыз қаншама? Ал біз сол абыройлы парызды қаншалықты атқарып жүрміз? Әсіресе, соңғы кездері балаларын орыс тілді балабақша мен мектепке беріп жатқан жас ата-аналардың саны көбеюде. Тілі енді шыққан бүлдіршінге басқа тілді мультфильмді көрсетіп, орыс балабақшасына беріп, қазақ тіліне деген құрметті жойып жатқан өзіміз екенін біліп жатырмыз ба? Көпке топырақ шашқым келмейді, десе де қоғамдық орындарда, әсіресе жастарымыз өз тілінде сөйлемеуі, ішіңді удай ашытатыны рас.

Тіл – қашанда ұлттың ұйтқысы әрі айнасы екенін білеміз. Сөзі өз тілінде шыққан халықтың егемендігі баянды, іргесі қашан да биік болмақ. Қазіргі кезде мемлекеттік тілдің қоғам өміріндегі маңызы үлкен рөл атқарады. Жас ұрпақтың тілі ана тілінде шығып, қазақ тілінде білім алуына, басқа да тілдерді жетік меңгеруіне толық мүмкіндіктер жасауымыз қажет. Ананың сүтімен бойға дарыған туған тілді құрметтеу - ең қымбат, ең асыл қасиеттердің бірі. Ал, осы қасиеттерді жастардың бойына сіңіріп, қазақ тілінің мәртебесіне сызат түсірмеу баршамыздың жұмыла көтерген жүгімізге байланысты деп білемін.

Тіл мәселесіне келгенде бәріміздің жауапкершілік танытуымыз, елге, болашаққа деген құрметіміз емес пе? Өйткені, мемлекеттік тілдің қолданыс аясын кеңейтіп, мәртебесін өсіру жолында мұндай жауапкершілік болмаса, қолға алған істеріміздің нақты мақсатқа жетуімізге айтарлықтай кедергісін келтірері анық. Әсіресе, кейінгі жастар қазақ тілін үйренуге, қазақ тілінде сөйлеуге әуестенсе екен деймін. Себебі жастар -елдің болашағы. Ал, ел келешегі тек қана экономикалық жетістіктермен ғана емес, мәдени-рухани қазынамызбен де айқындалып, тұғырлана түсері айдан анық. Жастарымыз тіл мәселесіне келгенде жанашырлық танытып, өз тілін құрметтесе, ана тіліміздің де ғұмыры ұзақ болар еді.