Анама өлеңі бойынша анаға арналған шығармашылық материал

Анама.

Ғұмырың тұнған ғибрат,көңілің дария шалқыған

Анашым сенің әлдиің мен үшін жақұт, алтын ән.

Жүзіңнен көрем қуаныш, шапағат нұрын шарпыған

Анашым сендей болсам деп, армандап, аңсап талпынам.

Түндердің сансыз түріп ап түндігін ашып, әлдимен

Мауқымың басып маужырап, сырласып бала сәбимен,

Ақ сүтің беріп аялап, әлдилеп мені өсірдің

Өзіңдей алтын құрсақты аналар шықсын әр үйден.

Құшағың ыстық анашым, күлшедей піскен қолымда,

Мен үшін бәйек болдың көп, сүреңсіз өмір жолында,

Иіскеп, басып бауырыңа, сүйеніш болып келесің

Тірегім сенсің анашым, ерлік қой ерен соның да.

Қуансам бірге қуанып, жыласам дәйім жұбатып,

Халімді білдің өзің кеп, кей- кейде жұрттан сұратып,

Жүрмісің ана, мені ойлап, перзентім аман болсын деп

Көңліңнің ақ бәйтерегін алмашы анам құлатып.

Жетістік алсам мадақтап, арқамнан қағып, жүресің,

Қуанышымызды бөлісіп, шаттанып бізбен күлесің,

Сезеді -ау сыршыл жүрегің, сонда да сырың бермейсің

Көріпкелмісің анашым, сезесің , бәрін білесің?!

Қайратың мықты болаттай, құрышта қайнап шыныққан,

Сөздерің інжу-маржандай, тұңғиық терген тұнықтан,

Өзіңді тыңдап, есейдік, азат боп талай құрықтан

Өзіңнен тәлім алып көп, өзіңнен талай сыр ұққам.

Анашым аппақ айымсың, барымсың және бағымсың,

Күнімсің жылу беретін, шуақсың, атар таңымсың,

Анашым панам, тірегім, арымсың менің жанымсың

Мен үшін оттай лаулаған, өшпейтін мәңгі жалынсың!

«№114 ЖОМ» мемлекеттік мекемесінің

бастауыш сынып мұғалімі: Мыржыбаева Ұлжалғас Бектұрғанқызы.

Мейірім нұрың сарқылмас, анашым дәйім біз үшін