Анашым тақырыбындағы шығарма, 3 сынып оқушысы

Жоламан Жаншуақ

№73 жалпы білім беретін орта мектептің 3А класс оқушысы.

Анашым!

Мен үшін пейілі кең, жүрегі дархан бір адам болса, ол- менің абзал анашым. Ешкімге ұқсамайтын, дара да дана тұлға. Анамды мен ғана емес оқырмандары да жақсы көреді. Олай дейтінім, менің анам халықпен жұмыс істейді. Мамандығы-журналист. Жұртшылыққа дер кезінде шынайы ақпарат жеткізіп отырады. Танымал адамдармен сұқбаттасады. Теледидардан арасында көріп марқайып қаламын. Мен анаммен мақтанамын. Анама еліктеймін.

Мен анамның арқасында самбодан бірнеше дүркін әлем чемпионы Райса Байлиевадан қолтаңба алдым. Ондағы мақсатым- Райса апамыздың бойындағы өрлік пен ерлік қасиетін бойыма дарыту. Биік шыңды бағындырсам деген асқақ арманым бар.

Маған өмір сыйлаған жан анамның тағы бір ерекше қасиеті- адалдығы мен шыншылдығы. Қызметінде журналист болғанымен, үйде кішіпейіл келін. Үнемі басынан ақ орамалын тастамайды. Атам мен әжеме күнде таңертең тұрып сәлем етеді. Батасын алады. Атам да әжем де мәз.

-Анашым, неге сіз үнемі ақ орамал тартасыз? Неге көк, қызыл емес? Күнде неге иіліп сәлем етесіз?,- деп сұрағанымда:-Балапаным, ақ түс адалдықтың, пәктіктің белгісі. Жолымыз ақ болсын дегенім. Үлкендерден бата алғаным, Ісіміз оңды болсын дегенім. Қариялардың тілегімен шабыттанамын,-деді. Мен риза болып, сүйсініп қарадым.

Биыл менің анам ауырып қалды. Ота жасатты. Анам бір ай қасымызда болмағанда жүрегім бос қалғандай сезіндім. Ең қиын сәтті бастан өткердік. Іздедім. Алладан анамның тез жазылып кетуін тіледім. Оқырмандары да саулық тілеп хат жазып жатты. Менің тілегім қабыл болды. Аман есен үйге оралды. Әкем, қарындасымыз үшеуміз қатты қуандық. Аналар, ауырмасыншы. Мен асыл анамның құлан таза айығып, жүрегінің қалауы жұмысына қайта қосылатын күнді асыға күтіп жүрмын. Аман бол, ана!