Ауылдың адам өміріндегі тәрбиелік маңызы

Ауылым – алтын бесігім.

Уа, дариға алтын бесік туған жер,

Қадіріңді келсем білмей кеше гөр.

Жата алмас ем топрағыңда тебіренбей,

Ақын болмай, тасың болсам мен егер,

-деп дауылпаз ақын Қасым Аманжолов жырлағандай әркімге туғанжері оттан ыстық, жаныңдай қымбат. Біздер үшін балдәурен балалық шағымыздың думанды күндері өткен Балқантау бәрінен ардақты, бәрінен қасиетті. Талай ғасыларды бастан кешкен Балқантау бауырынан ұлтымыз ұлықтаған, халқымыз мақтаныш тұтқан танымал тұлғалар түлеп ұшты.

Іргетасы 1909 жылы Ресейден қоныс аударған мұжықтардың елді мекен салуынан қаланады. Елді мекеннің атын, Балқантау тауынан бастау алатын «Егіндібұлақ» атты бұлақтың атын мұжықтардың орыс тіліне «Хлебородное» деп аударуымен, сол кездегі Орынбордың генерал – губернаторы өз бұйрығымен бекіткен.

1928 жыл Қарқаралы уезіне қарасты Қу, Едірей және Байыр болыстарының ауқымды бөлігі негізінде құрылып, оның әкімшілік орталығы болып – «Хлебородное» ауылы белгіленеді. Отызыншы жылы Қазақ КСР –і Жоғарғы Кеңесінің Төралқасы желгілікті халықтың сұрауы бойынша аудан орталығының атауын – Егіндібұлақ ауылы деп өзгерту туралы өз Қаулысын қабылдайды.

Егіндібұлақ өңірі туған еліне ғана емес, көршілес әрі алыстағы елдерге ақыл- парасатымен, қайраткерлік істерімен, туа біткен өнерімен кең танымал болған- Қазақ елін таныта, мойындата білген Ұлы адамдардың мекені. Бұл өңірде қазақ халқының біртуар ұлы, ірі мемлекет қайраткері Қаздауысты Қазыбек би Келдібекұлы, ұлы күйші Тәттімбет Қазанғапұлы, ақиық ақын сазгер Мәди Бәпиұлы, белгілі қоғам және мелекет қайраткері Нығымет Нұрмақұлы Нұрмақов сынды көптеген ірі тұлғалар туып өскен. Сондай- ақ бұл өңір – ұлы Абай Құнанбайұлының анасы Ұлжанның туған жері, яғни ұлы ақынның нағашы жұрты.

Ауылда қазақтың үшбиінің бірі – Қаздауысты Қазыбек би Келдібекұлына, шертпе күйдің негізін салушы кемеңгер сазегер Тәттімбет Қазанғапұлына және қазақтың біртуар перзенті, әйгілі сазгер, ақиық ақын Мәди Бәпиұлына ескерткіштер орнатылған.

Ауыл. Қазақтың ежелден ата қонысы, алтын бесігі. Ауылды ардақтау – қазақты ардақтау. Не бір азуымен құс тістеген аты шулы ақылмандар мен кемеңгерлер – ауыл балалары, аталары мен әжелерінің аялы алақанын көрген тәлім – тәрбиесін алған асыл текті ұрпақтар.