Бала тәрбиесіндегі қателіктер ата-аналар жиналысы жоспары

Ата-аналар жиналысының жоспары

Мектеп: №31 орта мектеп Сынып: 8 «б»

Мерзімі: 28.12.18 Ата-аналар саны:

Ата-аналар жиналысының тақырыбы: «Бала тәрбиесіндегі біздің қателіктеріміз»

Мақсаты: Бала тәрбиесіндегі ата-ананың ролі жайлы пікірлесе отырып, ата-аналардың өздеріне тәрбиеші-мұғалім ретінде қарауға қызығушылықтарын ояту; баламен дұрыс тіл табыса білуге, баланың білімге деген ынтасын арттыруға көмектесе білуге үйрету.

Барысы:

«Ақшақар» жаттығуы.

Мұғалім:

Қадірлі ата-аналар қазір біз сіздермен қызықты жаттығу жасаймыз. Ең бастысы ешнәрсеге алаңдамаңыздар, ешкімге қарамаңыздар, менің нұсқауларымды тыңдай отырып, орындасаңыздар болғаны.Әрқайсысыңыздың алдыңызда ақ парақ жатыр. Барлық парақтардың пішіні де, түсі де, өлшемі де бір. Мұқият тыңдай отырып, айтқандарымды орындаңыздар:

Парақты ортасынан бүктеңіздер.

Оң жақ жоғарғы бұрышын жыртып алыңыздар.

Тағы да ортасынан бүктеңіздер.

Тағы да оң жақ жоғарғы бұрышын жыртып алыңыздар.

Осылай ақ қағаз бүктеуге келмейтіндей болғанша бүктеп, оң жақ бұрышын жыртып ала бересіз. Ал, енді бүктелген қағазымызды жазайық, қолдарыңызда «әдемі ақшақар» пайда болды. Ата-аналар қолдарыңыздағы ақшақарларды салыстырып көріңіздерші, ішінен бірдей «ақшақарды» табуға болады ма?Ата-аналар «жоқ» деп жауап береді.

Мұғалім:Қалай ойлайсыздар неге? Неліктен?

Ата-аналар тарапынан түрлі жауап нұсқалары айтылады. Сөйтіп жиналысқа қатысушылар төмендегідей қорытынды жасайды: Біркелі адамдар болмайды. Сондықтан да бірдей материалдан, бір нұсқау бойынша жасалған ақшақарларымыз да әр түрлі болып шықты.

Мұғалім: Біз жасаған қорытынды бүгінгі әңгімеміздің бастауы болмақ. Біркелкі адамдар болмайтыны сияқты, біркелкі балалар да болмайды. Яғни олардың қабілеттері, қызығушылықтары, мүмкіндіктері және тұлғалық қасиеттері де әр түрлі.

2. «Балаңыздың мектепке көзқарасы қандай?» сауалнамасы

Мұғалім: Қалай ойлайсыз балаңыздың мектептегі жағдайы жақсы ма? Мектепте балаңызды алаңдататын проблема бар ма, жоқ па анықтауға тырысып көріңіз. Егер тұжырыммен келіссеңіз «+», келіспесеңіз «-» қойыңыз.

Менің балама мектепте оқыған ұнайды.

Менің ойымша, балам басқа мектепке қуана-қуана ауысқан болар еді.

Егер таңдау жасауға мүмкіндік болса, оның үйде оқығысы келмес еді.

Өкінішке орай менің балам ешқашан маған және туыстарына мектеп жайында қуана отырып әңгімелеген емес.

Сыныпта оның достары көп.

Оған мектептегі мұғалімдер онша ұнай бермейді.

Ол сыныптан тыс шараларға, кештерге, түрлі сайыстарға белсенді түрде қатысады.

Менің балам сабақ болмайды (мұғалімнің ауырып қалуына немесе т.б. себептерге қатысты) дегенге қуанары хақ.

Менің балам ескертіп отырмасаң, сабағын әзірлемейді.

Оның басқа қызығушылықтары, хоббиі сабақ оқуына кедергісін келтірмейді.

Сәйкес келген белгілерді санаңыз:

8-10 балл. Сіздің балаңыздың мектепке қарым-қатынасы жақсы, оған мектепке барған, сабақ оқыған ұнайды, жуық арада оқуға қатысты ешқандай проблема туындамауы тиіс.

6-7 балл. Мектепке қарым-қатынасы жаман емес. Бұл жағдайды нығайта түсу үшін балаңызға сіздің оның білім алғанына немқұрайлы қарамайтындығыңызды, оның жетістіктеріне қуанатыныңызды жиірек айтып, түсіндіріп отырыңыз.

4-5 балл. Абай болыңыз. Балаңыздың мектептегі өмірі дұрыс бағытта өріс алып жатқан жоқ. Балаңыздың мектепке мұндай қарым-қатынасының себебін анықтауға, оған көмек беруге тырысыңыз.

1-3 балл. Балаңыз сіздің көмегіңізге зәру. Оның үлгерімінің төмендеуімен, біреулермен өзара келіспеушілігімен байланысты мектепке қарым-қатынасы дұрыс емес. Тез арада бұның себебін анықтап, сынып жетекшісімен, пән мұғалімдерімен, мектеп психологімен сөйлесіп, бірлесе отырып шешу жолдарын қарастыру қажет.

Ресурстар: Таныстырылым, интерактивті тақта, ақ парақшалар, түрлі-түсті қағаз, конверттер, жадынамалар, сауалнамалар, нақыл сөздер.

Таныстырылым, №2-3 слайд

3.Баяндама:

Отбасының басты қазығы, алтын тіреу діңгегі – бала. Дүниеге келерінде де, келген соң да әке-шешесін бірден-ақ боямасыз татулыққа, сыйластыққа, ынтымаққа шақыратын, ата-ана көңілін жақындастыра түсетін – бала. Перзентсіз үйдің бар жұбанышы бүгінгісі ғана, оның өзі де өткінші екенін, ертеңгі қуанышы, қызығы қырқылып, үзіліп қалатынын әділетшіл халық ашық та айтады, ашып та айтады. Сондықтан да ол «Бесіксіз үйде береке жоқ» деп түйеді. Бұл – халықтың қамын қарастыру, елдікті ойлау, елдің ертеңгісі жөнінде қам жеу. Осы ойды ертеден келе жатқан «Ата–бәйтерек, бала–жапырақ» деген бейнелі мақал да растайды. Әрине, өсетін, өрбитін ағаш жылда бүршік жарады, жапырақ жаяды. Болашағы бар деп осыны айтады.

Ата-ананың ықпалы өзінен-өзі бола қалмайды, балалар олардың қылықтарын көздерімен көреді, ал бір көргенін тағы бір, сосын тағы бір рет көрген соң, ол мәңгі есте қалып, санасынан мықтап орын алады. Естігені де осы қағида бойынша бір, екі, үш рет дереу дайын формула секілді санадан қалқып шығып, іс-әрекетке айналады.

Балаға отбасы мүшелерінің сөзі, мінез-құлқы ғана емес, ондағы қоршаған заттар да әсер етеді. Үйде кітап көп болса, отбасы иелері - әкесі мен шешесінің ұстағаны қағаз, қалам, оқығаны кітап болса, баланың да көз ашып көргенінің қаншалықты әсерлі болатыны ғылыми-педагогикалық, көркем әдебиеттерде де айтылып келеді. Баланың естігені оқу-ғылым жайлы болса, әке-шешесінің сөзі де сол болса, ондай баланың болашақта таңдап алар жолы да соған сәйкес болмақ, әрине егер ата-анасы соған оны тарта білсе.

«Әкеге қарап ұл өсер, шешеге қарап қыз өсер» дейді халық даналығы. Бала кішкентай кезінен-ақ әр нәрсеге әуестеніп үлкендерге көмектескісі келеді. Бұған кейбір әке-шеше «жұмысымды бөгейсің, істеп жатқан ісімді бүлдіресің» деп ұрысып жіберуі мүмкін. Бұл қате түсінік. Керісінше, өзің жұмыс істеп жүргенде баланың қолынан келетін ісіне жағдай туғызып, оның үйренуіне көмектескен орынды. Тіпті балаға берген тапсырмаңыздың аяғына дейін орындалуына төзімділікпен бақылау керектігін де ұмытпаған жөн. Өстіп баланың бірте-бірте еңбекке деген болашағына жол ашылады. Әрі істеген ісін ұқыпты да тындырымды орындауына бағыт бересіз.…