Балабақша тәрбиесі мен білімінің маңызы туралы эссе

Балабақша – барлық тәрбие мен білімнің Ең алғашқы баспалдағы

«Тәрбие тал бесіктен басталады» дегенді халқымыз бекер айтпаған болар. Тал бесіктен кейінгі тәрбие баспалдағы балабақшаға ұласатыны анық. Өскелең ұрпақтың балауса жанына өз елінің өткеніне, бүгініне, болашағына зор сеніммен қарайтын, күш жігерін елі үшін аянбай жұмсайтын азамат болудың алғышарттарын балабақша қабырғасы қалайтын болар. Барлық білімнің бастауы – балабақшадан басталады.

Тәрбие мен білім – егіз. Мектеп жасына дейінгі балалардың қоршаған ортаға деген өзіндік ой-өрісін қалыптастыру, ұжымдық бірлестіктегі психологиялық дамуын жетілдіру балабақша тәрбиешілерінің бастығы қағидаты болары анық. Егемен еліміздің талабына сай мектепке дейінгі тәрбие мен білім беру, жаңа заманның талабына сай білімді де тәрбиелі ұрпақ өсіру өркениетті мемлекеттердің басты міндеттерінің бірі болып табылады.

Өз ұлтын сүйетін, өз тарихын, туған тілін құрметтейтін, ұрпақтан ұрпаққа жалғасқан салт-дәстүрін дәріптейтін, ұлтымыздың бойындағы қадір-қасиеттерді арттыруға үлес қосатын саналы тұлғаны қалыптастыру «инемен құдық қазғандай» көзге көрінбейтін еңбек. Туған елі үшін аянбай тер төгіп қызмет ететін, халқымыздың мол рухани құндылықтарын қастерлейтін, бағалайтын жасөспірімнің қалыптасуы мектепке дейінгі тәрбиенің еншісіне салмақ пен мән қосқандай. Кез-келген жасты отан сүйгіштікке тәрбиелейтін ең бірінші ата-ана тәрбиесі, екінші білім беру мекемелерінде еңбек ететін тәлімгерлердің тәлімі. Қоғамға парасатты, адамгершілігі жоғары бала тәрбиелеу біз үшін басты міндеттердің бірі. Үздіксіз тәрбие ғана адамгершілік атты асыл қасиеттерді жасөспірімнің жанына серік ете алады.

Абай атамыз айтқандай, бүгінгі жастардың дүниенің кетігін тауып, қалануды көздеу, қоғамдық өмірден қол үзбей, өз елін сүюге, өз елінің тұрмыс-тіршілігін, салт-санасын, әдет- ңұрпын білуге тәрбиелеу – нарықтық кезеңде маңызы жоғары тұрған зор міндеттердің бірі деп ойлаймын. Осы тәрбиенің ең маңыздысы – балаға патриоттық тәрбие беру. Халқымыздың тарихына терең үңіле білсек, жасынан жарқыраған күміс көмей әншінің, жаужүрек батырдың, нар тұлғалы палуанның да елі мен жері үшін аянбағанын байқайсың. Ендеше көкірек көзімен тарихты тамырынан тамшылата, жас ұрпақ зердесіне зерлей, әрі шырайлы сөзбен кестелей таныту ата-ана мен ұстаз-тәрбиеші шеберлігіне байланысты болмақ