Баланы тәрбиелеу туралы эссе мектепке дейінгі балаларға

Эссе

Әлемде баланы тәрбиелеуден асқан игі іс жоқ...

Бала тәрбиесінің алғашқы алтын қазығы-тұған ұясы, өз отының басындағы тәрбиесі. Қазақтың «Баланың бас ұстазы – ата-ана», «Балапан ұяда не көрсе, ұшқанда соны іледі» дегендей, тәй-тәй басып, есі кіріп, тілі шыға бастағаннан–ақ баланы байсалды, ұғымпаз, тілалғыш етіп баулығаны дұрыс.

Шын мәнінде бүгінгі жас –ертеңгі елдің мызғымас тірегі, келешек келбеті. Жас ұрпақтың білімді, бәсекеге қабілетті, жан-жақты әлеуметтенуі ел дамуындағы аса маңызды фактор болып табылады. Дана халқымыз «Ағаш түзу өсу үшін оған көшет кезінде көмектесуге болады, ал үлкен ағаш болып өскенде оны түзете алмайсың» деп бекер айтпаған. Сондықтан баланың бойына жастайынан ізгілік, мейірімділік, яғни адамгершілік секілді құнды қасиеттерді сіңіріп, өз-өзіне сенімділікке тәрбиелеуде отбасы мен педагогтар шешуші рөль атқарады.

Бала әрқашанда ата-анадан мейірімділікті, сүйіспеншілікті, жүрек жылуын қажет етіп, ата-ананы өмірдің тірегі деп санайды. Дүниенің ең тамаша туындысы-тамаша тәрбие алып шыққан адам болып табылады.Туған үйдің жылуы- оның көкірегінде көп жылдар бойы сақталып, мәнгі есінде болады. Баланы өздігінен өмір сүруге мүлде қабілетсіз нәресте кезінен бастап бақытты балалы шақ, жеке шаңырақ көтергенге дейінгі жастық жолдарды өтетін отбасын өмір айдынында жүзіп бара жатқан қайыққа теңесек, оның қос ескегі – әке мен ана дер едік.

Баланың тәрбиесінде отбасы мен педагогтар шешуші рөль атқарады. Педагогтар баланың сауатты дұрыс өмір сүруіне бағыт-бағдар берсе, мектептегі орта, қоғам балаға мәдениеттілікті, әдептілікті, адами құндылықтарды, адамгершілік қасиеттерді, қарым-қатынасты, жауапкершілікті үйретеді.

Ата-ана мен мектеп, нақтылап айтқанда ұстаздар бірігіп, баланың бойында интеллектуалды әлеуеті дамыған тұлғаны көргісі келеді. Бала өзіне табиғат берген ой, сана, ақыл, парасат секілді қасиет- қабілеттерін оқу, білім алу, тәжірибе жинақтау арқылы жетілдіріп, ұлты мен Отанының мүддесіне жарата алатын дара тұлға болып қалыптасуына ықпал жасауымыз керек.

«№56 Т.Белгібаев атындағы жалпы білім беретін мектеп»

КММ мұғалімі Жанабекова Улдан Ибрагимовна