Білімді әрі зерек болу туралы эссе, 10-сынып

«Білімді, зерек адам болам!» - десең, Қара өзіңді басқаның айнасымен»

Ұлт руханиятының ұлы жанашыры Мәшһүр Жүсіп Көпейұлы— қазақ тарихындағы тұлғасы бөлек құбылыс. Жастайынан қызыл тілдің құдіретін түйсініп, халқымыздың бай ауыз әдебиетін жинақтаған арқалы ақын сөз өнерінің алтын сандығы іспеттес. Ел ішін аралап ескіден келе жатқан жыр-дастандарды, шежірені хаттай жүріп ол халқының халімен терең танысады. Құлдық қамыты қараңғылықта тұншықтырып, қарашекпендер келіп атамекенінен айырған қазақты өжет жан отты жырларымен ұйқыдан оятуға тырысады. «Халық сөзі – Алланың қаламы» деген әулие ақын құдай берген қасиетін қазақтың қамы үшін, ғұмырын алашты азаттықтың ақ таңына жақындату үшін жұмсайды.

Ғұлама «Өнерге ғылым-білім болсаң жерік, Берілер ақыр бір күн басыңа ерік» деп бостандыққа апарар жол ретінде өнер-білімді нұсқайды. «Ойлама кісі екен деп өнерсізді» деген ақын өмірге адам болып келген соң адамның парызы кері тартар надандықтан арылып, өнердің өріне жүзу екенін баса айтады. «Жарлыға — мал, байға — көрік» болатын ғылым-білім қуу адамдық қадірді арттырар ең тура жол, өйткені тәрбиесін түзеп, білімін шыңдаған кісі қоғамға қажет, қастерлі жанға айналады. Алты алаш ардақтаған ақынның «Бір іске жұртқа ұнайтын сарып қыл күшің» деген өсиетін бойтұмар тұтып, мен де болашақта таңдаған мамандығымның шебері атанып, еліме пайдам тиіп, Мәшһүр Жүсіп меңзеген «мағыналы өмір» сүруді көздеймін. Әр азаматы білімді және білікті болған ел ғана бақытты болашақтан үмітті болады.

Мәшһүр Жүсіптің кеңесі қай заманда да өзекті, өйткені бүгінде президентіміз де «Жаңа Қазақстанды» құру үшін біздің басты құндылықтарымыз сапалы білім мен адал еңбек болуы қажеттігін ескертіп келеді. Патша мен кеңестің саясаты салдарынан туған халқынан қол үзіп қалған әулие ақынның асыл мұрасы – халқымыз қанып ішер ақыл дариясы.

Тұлғалық дамуға жаппай талпынған қазіргі тұста Мәшһүр Жүсіптің шығармалары дайын тұрған нұсқаулық тәрізді. «Айна қыл өзіңді-өзің түзетуге, Бұл жүрген жақсы-жаман көп адамды» деп ақын адамның өзгерісті өзінен бастап, өзгелердің іс-әрекетіне көзсіз ермей, керек тәлім ала білу қажеттігін көрсетеді. Кемеңгер ақынның мысалдарын оқыған сайын адамның тұңғиық болмысын бірыңғай ақ пен…