Бүгінгі қоғам мәселелері туралы әлеуметтік мақала

БҮГІНГІ

ҚОҒАМ МӘСЕЛЕСІ

• Бүгінгі таңда айналамыз көптеген мәселелерге толы. Экономикалық, экологиялық, саяси, әлеуметтік мәселелерді айта берсең, санай берсең жетіп артылады. Барлық мәселелерге халық бір-бірін кінәлауда. Алайда көп адам бар мәселенің шешімі әр адамның өз сана-сезімінде, өз түйсігінде жатқанын түсіне бермейді. Менің ойымша, барлық проблеманың бастауы — осы, яғни адамның ішкі жан дүниесінен шығады.

• Айналаңа бір сәт назар аударып көрші. Айналаңдағы адамдардың бәрі көңілсіз жүретіндей. Өмірің сұр түнектей, бір мәселе аяқталмай жатып, екіншісі шыға келеді. Бәрі өз ортасынан қашып, басқа жаққа кеткісі келетін сияқты. Әлеуметтік желілерге бір көз жүгіртсең де, сол бір таусылмайтын проблемалар. Кейде балалық шағымның шуақты күндері қайда қалды екен деп ойланамын. Неге адамдардың бәрі көңілсіз, бақытсыз көрінеді деп көп ойға кетем. Соңында түсінгенім — барлығы адамның өз санасынан басталады екен. Бақытты болудың кілті әркімнің өз ішінде, бірақ өкінішке қарай, оны бәрі бірдей түсіне бермейді.Әрине, қазіргі қоғамда бұдан да маңызды гендерлік теңдік, алауыздық, терроризм, апаттар, түрлі қылмыстар сияқты күрделі мәселелер бар ғой деп ойлауың мүмкін. Бірақ менің ойымша, бұл мәселелердің де түп-төркіні — адамның ішкі түйсігінен бастау алады. Ал әлеуметтік желілер мен қоғамдағы түрлі қорқынышты оқиғалар біздің санамызды улап, осындай проблемалардың өршуіне себеп болуда.

• Кейде түрлі мәселелер туындағанда: "мен емес, қоғам сондай" деп, немқұрайлық танытатын жандарды жиі кездестіреміз. Қарапайым мысал — қоқыс тастағанда "мен ғана емес, бәрі солай істейді ғой" деп кез келген жерге лақтырып жүре береді. Бірақ бөлшектен бүтін, кішкентай нәрседен үлкен дүние пайда болатынын ұмытпауымыз керек. Сіздің санаңыздағы кішкентай мәселе кейін бүкіл қоғамға қауіп төндіретін мәселеге айналуы әбден мүмкін.

• Қорытындылай келе, тоқсан ауыз сөздің тобықтай түйініне келер болсақ,қоғамдағы бар мәселе — әр адамның өзінен басталады дегім келеді. Егер қоғамды өзгерткің келсе, алдымен өз сана-сезіміңнен баста. Сонда ғана сен қоғамдық қана емес, өзіңнің де жеке өміріңдегі мәселелердің шешімін таба аласың. Ең бастысы — немқұрайлық пен қатігездікке жол берме. Тек жақсылыққа ұмтыл!