Дінтанудың өзекті мәселелері конференциясы туралы мақала

ӘЛ-ФАРАБИ АТЫНДАҒЫ ҚАЗҰУ-ДЕ «ДІНТАНУДЫҢ ӨЗЕКТІ

МӘСЕЛЕЛЕРІ» АТТЫ РЕСПУБЛИКАЛЫҚ ҒЫЛЫМИ-

ПРАКТИКАЛЫҚ КОНФЕРЕНЦИЯ

2024 жылы 28 қарашада әл-Фараби атындағы ҚазҰУ-де «Дінтанудың өзекті мәселелері» атты республикалық ғылыми-практикалық конференция өткізілді. Бұл іс-шара еліміздегі діни зерттеулердің дамуы мен оның қоғамдағы рөліне арналған маңызды басқосулардың бірі болды. Конференцияға Қазақстанның түкпір-түкпірінен жиналған дінтанушы ғалымдар қатысты. Іс-шараның мақсаты – Қазақстандағы дінтану саласының қазіргі жағдайын талқылап, осы саладағы зерттеулер мен тәжірибенің өзекті мәселелеріне назар аудару. Сонымен қатар, дін мен қоғам арасындағы қарым-қатынасты реттеудегі жаңа тәсілдер мен әдістерді ұсыну болды.

Конференцияның ашылу салтанатында Қазақстандағы дінтану ғылымының негізін салушысы Байтенова Нағима Жаулыбайқызы сөз сөйледі. Ұйымдастырушылар мен шақырылған қонақтар дінтану ғылымының маңыздылығын атап өтті. Бас баяндамашылардың қатарында еліміздің жетекші ғалымдары мен сарапшылары болды. Олар қазіргі діни ахуал, дәстүрлі құндылықтарды сақтау және жаһандану жағдайында Қазақстанның тұрақтылығы мен бірлігін нығайту туралы маңызды ойларымен бөлісті.

Конференция аясында төмендегідей негізгі тақырыптар талқыланды:

1. Қазіргі кезеңдегі діни дәстүрлердің трансформациялануы; 2. Жаһандану шарттарындағы діни бірегейлік; 3. Әйелдердің діни радикалдануы себептері мен ерекшеліктері; 4. Қазақстандағы діни және дінтанулық білім беру үрдісі; 5. Қазіргі Қазақстандағы неотәңіршілдік құбылыстарын талдау.

Іс-шара барысында қатысушылар тәжірибелерімен бөлісіп, дінтану саласындағы жаңа зерттеулердің нәтижелерін ұсынды. Сонымен қатар, дінтану ғылымын жетілдіру және оны білім беру бағдарламаларына енгізу бойынша нақты ұсыныстар жасалды.

Конференцияның қорытындысында барлық қатысушылар дінтану саласындағы ынтымақтастықты одан әрі дамытуға және ұсынылған идеялар мен зерттеу нәтижелерін тәжірибеде жүзеге асыруға ниетті екендерін білдірді. Сондай-ақ, бұл іс-шара Қазақстан қоғамының рухани құндылықтарын нығайтуға бағытталған маңызды қадам болды деп танылды.

«Дінтанудың өзекті мәселелері» атты республикалық конференция еліміздің діни тұрақтылығын сақтау мен ғылыми негізделген саясатты дамыту үшін жаңа идеялар мен шешімдер ұсынған маңызды алаң ретінде есте қалды.