Келбетті болайық мектепке дейінгі балаларға кеңес

«Келбетті болайық»

(ата-аналарға арналған кеңес)

Келбеттің дұрыс қалыптасуына арналған ойын жаттығулар. Дұрыс келбет дегеніміз – адамның тұрақты қалпы, дене мен басты қиналмай еркін түзу ұстап тұруы.

Бос уақытта осындай ойын-жаттығуларды баламен бірге орындауға ұсынамын. Бұл ойындарды ата-аналармен және достарымен ойнауға болады.

Келбетті тексеру жаттығулары:

«Иықтар» - иықты жоғары-төмен көтеріп түсіру.

«Алға-артқа» - иықты алға-артқа қозғау.

«Құлып» - қолды арқаға, саусақтарын айқастырып «құлып» сияқты ұстау. Жаттығуларды 6-8 рет орындау.

«Ұстағыш»

Балалар ұстағышқа жүгіріп келіп : «Бір, екі , үш! Жүгір ұстағыш!»-деп айтады да, қаша жөнеледі. Ал ұстағыш оларды ұстайды. Демалу үшін олар алдын ала жаттап алған қалыпқа тұрады. (келбетке арналған жаттығулар) «Ұшақ» - аяқ алшақ, алға еңкейіп, қолды екі жаққа созу. «Зымыран» - аяқ сәл алшақ, қолды жоғары көтеріп алақандарын қосып ұстау. «Балерина» - оң аяқпен тұрып, қолды екі жаққа созу. Бұндай қалыпта тұрған балаларды уақытша ұстауға болмайды. Біраз уақыттан кейін басқа жүргішіні таңдап, ойынды жалғастыруға болады.

«Официант»

Баланың басына кітапты, кітаптың үстіне кубикті қою қажет. Қай ойыншы алысқа барса, сол жеңімпаз болады. Ойыннан кейін денені еркін ұстап мына қимылдарды жасаған жөн: қолды жоғары көтеріп, төмен түсіру, белге қою. Бірнеше рет орындау.

«Соқыр түлкі»

Екі бала («түлкілер») көздерін жұмып бір қатарға тұрады. Қалғандары («қояндар») олардың арасынан төртаяқтап тыныш еңбектеп өтуге тырысады. Сыбысты немесе шуды естіп қалған «түлкілер» көздерін ашпастан «қояндарды» қолмен ұстап қалу керек. Ұсталған бала жүргізуші («түлкі») болады. Осылай ойын жалғаса береді.

«Ұлу»

Балалар допты екі табанымен қысып жерге етпетінен жатады. Содан соң аяқты бүгіп, жанбасқа тірейді де қолмен көмектесіп алға қарай еңбектейді. (Доп ұлудың «үйшігі» болады.)

«Вагондар»

Балалар бір қатарға отырады аяқ түзу, допты екі қолмен ұстау. Содан сол залдың бір шетінен екінші шетіне ауысады, алдымен бір түзу аяқты алға, содан соң екінші аяқты алға, жанбаспен көмектеседі.