Кинорум сыныптан тыс жұмысқа арналған материал

Күні:

Сыныбы: 9-10

Тақырыбы: «Супер Дубль – үздік дыбыстаушыны іздейміз» (кинорум)

Мақсаты:

- Отбасылық құндылықтарды насихаттау.

- Әке мен бала арасындағы қарым-қатынастың маңыздылығын түсіндіру.

- Оқушылардың шығармашылық қабілеттерін дамыту.

- Оқушылардың тілдік қорын байыту.

Барысы:

І. Кіріспе

ІІ. Дубль – 1 (Қысқаметражды кинофильмді тамашалау)

ІІІ. Дубль – 2

ІҮ. Түпнұсқадан тамашалау

Ү. Қорытынды (Супер дубль иесі атанған топты жариялау)

І. Кіріспе.

Қайырлы күн, құрметті ұстаздар, оқушылар және барша өнерсүйер қауым! «Супер Дубль - үздік дыбыстаушыны іздейміз» атты шығармашылық байқауымызға қош келдіңіздер! Бүгін біз сіздермен бірге сиқырлы кино әлеміне саяхат жасаймыз. “Неге сиқырлы?” дерсіздер. Себебі, кино - өнердің ең ғажайып түрі. Ол бізді күлдіреді, жылатады, ойландырады және жаңа әлемдерге жетелейді. Ал бүгін біз сіздермен бірге осы киноның тылсым дүниесін тереңірек зерттейміз!

Байқауымыздың мақсаты - жас таланттарды ашу, қазақ тілінің мәртебесін көтеру және кино өнеріне деген сүйіспеншілікті арттыру. Біздің жас дыбыстаушыларымыз қазіргі заманның таза әртістеріне айналып, өз дауыстарымен кино әлемін бағындырады деп сенемін!

Енді, байқауымыздың ережелерімен таныстырып өтейін. Біз сіздерге қысқаметражды фильм ұсынамыз. Фильм дыбыссыз күйінде көрсетіледі. Сіздердің міндеттеріңіз - өз топтарыңызбен бірігіп, осы фильмге жаңа дауыс, жаңа өмір сыйлау!

Әділқазылар алқасы сіздердің актерлік шеберліктеріңізді, тіл байлықтарыңызды, шығармашылықтарыңызды және командалық жұмыс жасау қабілеттеріңізді бағалайтын болады.

(Әділқазылар алқасы таныстырылады)

Енді сайыскерлерімізбен танысайық! Сахнаға 9-10 сынып оқушыларынан құрылған топтарды шақырамын:

(Әр топ өздерін таныстырады: аты, ұраны, креативті сәлемдесу.)

ІІ. Дубль – 1.

Ал енді, назарларыңызды экранға аударуларыңызды сұраймын! Кино әлеміне саяхатымызды бастаймыз! (Фильм дыбыссыз күйінде көрсетіледі)

ІІІ. Дубль – 2

Ал енді сіздердің шығармашылық қабілеттеріңізді көрсететін кез келді! Топтарға дыбыстауға дайындалу үшін 10 минут уақыт беріледі.

(Топтар дыбыстауға дайындалады, топтар кезекпен сахнаға шығып, фильмді дыбыстайды)

Барлық қатысушыларға үлкен рахмет! Сіздер бүгін нағыз талант иелері екендеріңізді дәлелдедіңіздер!

ІҮ. Түпнұсқадағы фильм (Фильм түпнұсқада көрсетіледі)

Құрметті оқушылар, фильмнен алған әсерлеріңізбен бөлісуге шақырамын. Сіздерге бұл қысқаметражды фильм қалай әсер етті? Неге? (Оқушылар фильмнен алған әсерлерімен бөліседі)