Көктем аруы сынып сағаты, 2 сынып

Сабақтың тақырыбы: Көктем аруы

Сабақтың мақсаты: 1. Анаға деген бала махаббатын ояту.

2.Оқушының бойындағы өнері мен дарындылығын дамыту.

3. Адамгершілікке тәрбиелеу.

1-жүргізуші: Құрметті асыл аналар, қыз-қызғалдақтар, қадірлі ұстаздар! Қар астынан қылтиып, бәйшешек бой көтергенде, көктемнің алғашқы хабаршысы болып, аналар мерекесі келеді. Бәйшешек соншалықты нәзіктігіне қарамастан, қалың қар астынан бүршік жарады. Біздің асыл аналарымыз да бәйшешектей, барлық қиындыққа төзімді. Аналар, көктемгі гүлдей жарқырап, гүл мерекелеріңіз, күн мерекелеріңіз құтты болсын!

2-жүргізуші: Ал, құрметті қауым, көптен бері асыға күтіп жүрген «Көктем аруы» байқауын бастаймыз. Байқауымызды бастамас бұрын, біздің байқауымызға төрелік етуші әділқазылар алқасын тағайындап алайық.

1-жүргізуші: Уа, халайық, халайық,

Мұнда назар салайық,

Аналар мерекесіне арналған,

Қыздар сайысын бастайық.

2-жүргізуші: Мың бұралған арулар аңдап басып,

Келеді міне ортаға толқып тасып.

Аруларын сыйлаған халқым менің,

Көңілді қошеметпен қарсы алайық!

Ортаға сыныбымыздың қызғалдақтары, сүйкімді қыздарымызды ортаға шақырамыз

1-жүргізуші: Қыздар мен сендерге бір сұрақ қойғым келіп тұр. Ана деген қандай адам?

Зере :Ана дегеніміз – өмірдің бастауы мен таусылмайтын жалғасы.

Айым: Ана - тіршіліктің көзі , үлкен тағдыр, махаббат пен шабыттың нәрі.

Ақерке: Ана махаббаты адамға қанат бітіреді, күш береді.

Айдана: Ана- өмір гүлі.

Дана: Ана деген сөз барлық халықтың тілінде жылы естіледі.

Ясмин: Ана десе әр баланың тілегі ақ, мейірімі ұшан- теңіз.

Еркеназ: Анамыздың көңілі шат ,жүзі жарқын, дені сау болуын әрқашан тілейміз.

Т .Айша: Ана – сұлулықты, жарасылымдықты, көріктілікті, барша игілікті бойына сіңірген тұлга.

С.Айша: Ана- әлемдегі ең сұлу , ең мейірімді, ең қамқор адам.

Анель: Ана- әр үйдің алтын қазығы.

Нұрай: Ана ақылды болса, бала дана болады.

Тамина: Ана өз баласын жанымен де, қанымен де сүйеді

Самал: Ана –біздің күніміз! Ананың біз - гүліміз! Бізді, ана, қуантып, Ұзақ өмір сүріңіз.

1-жүргізуші:-Қыздар, сайысқа түсуге дайынсыңдар ма?

2-жүргізуші: Олай болса, бүгінгі сайысымыздың кезеңдерімен таныстырып өтейін.

1. «Мыңның жүзін білгенше, бірдің атын біл»

2. «Өнерлі өрге жүзер»

3. «Білімді мыңды жығар, білекті бірді жығар»

1-жүргізуші:- I кезең «Мыңның жүзін білгенше, бірдің атын біл»

Кішкене арулар келіп жетті танысуға,

Бойындағы бар дарынды дарытуға.

Қорықпастан сахнаға келіп жетті,

Әдеппен, ізетпен танысуға.

II кезең «Өнерлі өрге жүзер»

Ал, кімнің өнері бар қаншалықты,

Би билеп, ал біреуі ән салыпты.

Бүгінгі сайыста бәйге алуға,

Арулар аянбай-ақ жан салыпты.

ІІІ кезең «Білімді мыңды жығар, білекті бірді жығар»

Ал, арулар , білімге қалайсыңдар?

Сендер өтер әлі талай сын бар.

Тапсырма ал, қымсынбай кеп,

Жауап берсеңдер сұраққа, жарайсыңдар!

Келесі сайысымызда қыздарымыздың білімін сынайық. (Плакатта гүлдің суреті, қыздар гүлдің күлтесін алып, артындағы сұрақтарға жауап береді.)

IV- кезең

Осымен арулар 4 кезеңнен өтіп, өздерінің бойларындағы қасиеттерін көрсетті. Ендігі сөзді әділқазылар алқасына берейік. (Марапаттау)

Бойларыңда от бар екен байқадым,

Жүректерде шоқ бар екен байқадым.

Әрқашанда осы шоқты өшірмей,

Жалындатып, шарықтаңдар әрдайым!