Менің анам – алтын тақырыбындағы тәрбие сағаты, 3-сынып

Тақырыбы: «Менің анам – алтын!»

Мақсаты:1.Оқушыларды мейрімділікке, аналардың өлшеусіз еңбегін бағалай білуге үйрету. Анасын сүю арқылы еліне, жеріне деген сүйіспеншілігін арттыру.

2.Дүниедегі жақсылық атаулының бәрі күннің нұрынан, ананың мейірімімен тарайтынын ұғындыру.

3.Ана тілінен оқып үйренген өлең, тақпақтарын мәнерлеп айтуға машықтандыру, сөз қадірін түсінуге тәрбиелеу.

Көрнекілігі: Қанатты сөздер, суреттер, үнтаспа,гүл шоғы.

Барысы: 1.Ұйымдастыру.

Құрметті аналар, ұстаздар! Сіздерді 8-наурыз халықаралық әйелдер мерекесімен құттықтаймыз! Сіздерге шат көңіл, ұзақ ғұмыр, бақытты өмір тілейміз.Ана әлемнің жандүниесі, оның бастауы мен таусылмайтын жалғасы. Ана сөзі бізді елең еткізбей, жылылық пен шуақты сездірмей қоймайды. Әлемдегі ең асыл сөз – ана.

Сонымен біздің 3 «ә» сынып оқушылары ұйымдастырған «Менің анам – алтын!» атты ашық тәрбие сағатын ашуға рұқсат етіңіздер. Ендігі кезекті осы бүлдіршіндерге берелік.

1 - жүргізуші: -Түсінбеймін... түсінбеймін...

2-жүргізуші: Фарида, сен нені түсінбейсің?

1 - жүргізуші: -Неге күнтізбеде 8 –наурыз қызыл бояумен берілген? Ол қандай мереке?

2-жүргізуші: -Сен оны әлі білмейсің бе? -Балалар, Фаридаға түсіндіреміз бе?

Бәрі: Түсіндіреміз!

2-жүргізуші: -Алдымен ең қарапайым нәрседен бастайық. Айналаңа қарашы! Аспанға көз салшы! Енді терең дем ал!

1 - жүргізуші: -Ал, қарадым, аспанға көз салдым, терең дем алдым. Сонда не болды?

2-жүргізуші: -Не болғаны несі? Бүгін қандай күн?

Бәрі: мереке

Ән: «Ана» Бекмурзаева Нурайлымның орындауында.

2-жүргізуші: - Фарида, сен балалар айтқан өлең шумақтарынан 8-наурыз қандай мереке екенін түсіндің бе?

1 - жүргізуші:-Иә, Айжанар , мен бәрін түсіндім. 8-наурыз аналар, апалар мерекесі. Қымбатты аяулы аналар, біз сіздерді мерекелеріңізбен құттықтаймыз!

Фарида: Ақ сүтінен жаралған,

Ақ сүтінен нәр алған,

Анаға бас иеміз!

Туған елдің тілі деп,

Туған жердің үні деп,

Анаға бас иеміз!

Айжанар: -Осы отырған бәріміз аналарға борыштармыз. Оларға айтылар алғысымыз шексіз емес пе?! Елбасымыз Н.Ә.Назарбаев былай деген: «Шығыс халықтарының арасында, жалпы мұсылман әлемінде әйел затын ерекше бағалайтын, қарындасты қатты қадірлейтін халықтардың бірі де, бірегейі де біздің қазақ».

Ендеше бүгінгі айтылар ән де, ақ тілек, жылы сөз, барлығы сіздерге арналмақ.