Отаным бақыт ордасы тақырыбындағы сынып сағаты

Тақырыбы: «Отаным-бақыт ордасы»

Мақсаты: Оқушылардың бойында елжандылық, Отансүйгіштік, ұлттық құндылықтарды сақтау, қастерлеу дағдылары қалыптасады.

Күтілетін нәтиже: «Отан» ,отансүйгіштік, елжандылық сөздерінің мағынасын ашады.

Ұлттық құндылықтарды сақтау, қастерлеу оларды ұрпақтан-ұрпаққа жеткізу өз борыштары екенін түсінеді.

Көрнекілігі: Интерактивті тақта, суреттер, маркер, қағаздар, жүрекшелер

Сәлемдесу: Қош келдіңіздер! Добро пожаловать! Welcome! (уелком)

Ән ұран: Менің Қазақстаным!

«Шаттық шеңбері» (Ортада дөңгеленіп тұрады. Қолдарында кішкене жүрекшелер болады. Өлеңді айтып бір-біріне ұсынады.)

Күн сәулесін алақанға салайын,

Жүрегіме басып ,ұстап алайын!

Мейірімге толған сәби жүректі,

Алақанға сіздің әкеп салайын!

Мұғалімнің сөзі: -Қайырлы күн құрметті оқушылар, қонақтар!

-Балалар, алдымызда қандай мерекелер келе жатыр?

Балалардың жауаптары тыңдалады.

(1 желтоқсан Тұңғыш Президент күні, 16 желтоқсан Тәуелсіздік күні)

-Иә дұрыс айтасыңдар. Осы мерекелер қарсаңында біз сендермен бүгінгі «Отаным-бақыт ордасы» атты тәрбие сағатын ұйымдастырып отырмыз.

-Балалар әр нәрсенің сұрақтан туындайтыны заңдылық. Сондықтан да бүгінгі сабақты бастамас бұрын мен ортаға ерікті тілші Мұхаммеднысан Ахмедиярды шақырғым келіп тұр. Тілшіміздің сендерге қояр бір-екі сауалы бар екен .

Ахмедияр ортаға келе ғой.

-Бақыт дегеніміз не?

Ол менің отбасым, ата-ананың жылуын сезіну.

Ата –анамның қасымда болғаны.

Ол еліміздің тыныштығы.

Ұлттардың достығы.

Біздің алаңсыз бейбіт елде өмір сүруіміз.

Ол менің осындай кең байтақ Отаным, ол менің Қазақстанда өмір сүруім.

Ол менің қазақ болып өмірге келіп өз ана тілімде білім алғаным.

Ол еліміздің Тәуелсіз ел атанып, тарихымызды бүкіл әлем тануы.

-Тәуелсіздік қандай мағына береді?

-Бақыт пен Тәуелсіздік бір ұғымға сия ма?

(қонақтардың, оқушылардың жауаптары тыңдалғаннан кейін)

-Рахмет сіздерге. Мен жауаптарыңызға ризамын.

Мұғалім:

-Қанша жыл, қанша ғасыр өтсе де ұмытылмайтын оқиғалар болады. Ұмытылмайтыны , оның халық тағдырымен байланыстылығы. Ал халқымыздың тағдыры, бұл тарих.

Өткенімізді , яғни тарихымызды білмей, болашақты болжау мүмкін емес.

Мұғалім: -Ал ендеше балалар, халқымыздың тарихының беттеріне үңіліп Қазақстанның бұрынғысы, бүгінгісі және болашағымен тілдесіп көрейікші.

Әр топ алдарыңдағы қажетті мағлұматтардан постер құрап, қорғайсыңдар.

Құрастыруға 3 минут, қорғауға 3 минут уақыт беріледі.

(Үш топ алдарындағы «Бұрынғы», «Бүгінгі», «Болашақ» сөздері арқылы постер құрастырады.)

1-топ: «Бұрынғы»

Ел басқарған хандарым .(Әз Жәнібек хан,Керей хан, Абылай хан, Есім хан, Тәуке хан, Әбілхайр хан, )

Үш жүздің басын біріктіріп,

Ел бірлігін сақтаған билерім (Қаз дауысты Қазбек би, Әйтеке би, Төле би.)

Жаудан елін қорғаған, найзасын тасқа қайраған

Қол бастаған батырлар.

(Қара керей Қабанбай, Бөгенбай, Шапырашты Наурызбай, Би Боранбай, М. Мәметова, Ә. Молдағұлова, Т.Тоқтаров, Т.Бигелдинов,Р.Қошқарбаев, Б. Момышұлы. Қ.Рысқұлбеков. )

Тағылымы терең салт-дәстүрім бар.

(Шілдехана, бесік той, тұсау кесер, беташар, ашамайға мінгізу,)

2-топ:

«Бүгінгі»

Есілдің жағасына қонған әлем таныған жас елім бар, жүрегі елім деп соққан Ел басым бар, айбатты ән ұраным, еңселі Елтаңбам, тұғырлы көк туым, айбыны асқақтаған Ата заңым бар.(Астана, елбасы, елтаңба, ту,Ата заң)

Ғарышты бағындырған ерлерім бар, (Т.Әубәкіров, Т.Мұсабаев, А.Айымбетов.)

Көк байрақты тік көтеріп

Топты жарған ел жанды ұл-қыздарым бар.

(М.Шаханов, Димаш, С.Сәпиев, Қ.Ислам.А.Әшім. Р.Рымбаева.)

Досқа мейірбан, дұшпанға тас түйін

Бірлігі мен ынтымағы жарасқан

Жасампаз елім бар.

(Ұлан әскерінің суреті, халықтар достығы суреті)

3- топ: «Болашақ»

Білім мен ғылым жолында қарыштай қадам басқан ұл-қызы бар,

Ғарышпен тілдесетін, әлемнің біз білмеймін ғажайып құпиясын ашатын,

Әлемнің бірнеше тілінде еркін сөйлейтін, еліміздің бірлігін мызғымастай берік ұстайтын,

Отандық өнімдерімізбен байлығымызды еселеп арттырып , экономикасы шарықтай дамыған білімі мен бейімі жоғары салауатты ұрпақ біз боламыз.

Тарихи мұрамызды көздің қарашығындай сақтайтын, Бұрынғы мен Болашақтың ортасындағы Алтын көпірміз.

Сабақ алып сіздерден, тарихтан тамыр үзбеген, ұрпақтар сабақтастығын, жалғастырар жүздеген, Қазақстан деген «Мәңгілік елдің» болашағы біз боламыз!

Мұғалім: Осы үш кезеңнің тілдесуіне қандай ортақ тақырып айтуға болады?

Әрине «Отан»

«Отан» деген құлақтың құрышын қандыратын, жүректі тебірентетін керемет сөз емес пе?

Олай болса ақындардың тілімен «Отанымызды» жырлап көрейікші.

Бірнеше бала ортаға шығып М.Мақатаевтың «Отан» өлеңін оқиды.

1-оқушы: Мен оның күнін сүйем, түнін сүйем

Ағынды өзен, асқар тау, гүлін сүйем.

2-оқушы: Мен оның қасиетті тілін сүйем.

Мен оның құдіретті үнін сүйем!

3-оқушы: Бар жәндігін сүйемін қыбырлаған

Бәрі маған Отан деп сыбырлаған!

Жаным менің,

Кеудемді жарып шық та,

Бозторғайы бол оның шырылдаған!

4-оқушы: Отан!

Отан!

Бәрінен биік екен

Мен оны мәңгілікке сүйіп өтем!

Мұғалім:

Ал енді әр ұлттың өз Отаны, өздерінің мемлекеті, ұлттық рәміздері, Ата Заңы болатынын білдік. Сонымен қатар тыныштығын, бейбіт өмірін сақтайтын шекарасы болады екен.Қазақстанның жер көлемін , қалаларын, тау- тасын, өзен –көлін, орман тоғайын, жазықтарын көрсететін, басқа мемлекеттен бөліп тұратын Жердің кішкентай кескінін не деп атаймыз?

-Карта.

-Олай болса барлығымыз осы картаны құрастырып, сөйлетіп көрейікші.

(Қазақстанның бес өндірістік аймақ бойынша бөлінген картаны құрастырып, ерекшеліктерін атап өтеді )

1-оқушы: Батыс Қазақстаным Қара алтынмен баланған мұнай мен газға бай өлке.

2-оқушы: Шығыс Қазақстан түсті металдары жер қойнауында жарқыраған, ит тұмсығы батпайтын орман тоғайында алуан түрлі жан-жануарлар мекендеген құтты мекен.

3-оқушы: Солтүстік Қазақстаным миллиардтаған алтын астығы қамбаға құйылған, Отандық өнімдері әлемге әйгілі ырысты өлке.

4-оқушы:Оңтүстік Қазақстаным ақ мақтасы мен ақ күріші Ақ алтынға баланған , дәруменге толы жемісі бар күннің шуағына бөленген алқап.

5-оқушы: Сарыарқаның сықырлаған сары аязынан арқар ауған, жер қойнауы толған қара маржан-көмірі, жезі, жазиралы даласында ақбөкен ойнақтаған, Ерке Есілдің назына бөленген Қазақтың Сары даласы Сарыарқам –Орталық Қазақстаным.

6-оқушы: Осы кең байтақ жерімнің басын қосып, ортасында Еуразияның жүрегі боп соғып тұрған- Астана. Астананың қақ төрінде « Кіндігі жерге байланған, басы көкке бойлаған өмір ағашы-« Бәйтерек» қаламыздың символы болып тұр

Барлығы бірге: Біздің осы кішкентай жүрегіміз Отанымызбен мәңгі бірге соғады!

Мұғалім: Бүгінгі сабағымызды өлең жолдарымен қорытындылайық.

(Күйдің ырғағымен)

А.Мұхаммеднысан К.Ахметова «Сен-Қазақсың!» өлеңін оқиды

Кері байланыс: «Екі жұлдыз, бір тілек»

Білім басқармасы

№80 мектеп-гимназия

«Үздік сабақ»

Тақырыбы: Отаным-бақыт ордасы

2 сынып

Сынып жетекшілер: Елемесова А.Г. Төлеуханова Ш.Б

Астана қаласы

«Атамекенім- мақтанышым! »

Мақсаты : Оқушылардың Атамекен, туған жерді қоғай білу,

Отанын сүйе білу туралы түсініктерін кеңейту.

Міндеттері :

-Атамекенді, туған жерді қадірлей білу, атамекенге қызмет ету,

адам өмірінде атамекеннің алатын орны иуралы мағлұмат беру;

- Оқушылардың өз атамекені , туған жері туралы мәліметтер мен тарихы туралы білімдерін кеңейту;

- Өз атамекеніне , туған жеріне деген сүйіспеншілігін, мақтаныш сезімдерін арттыру:

- Қазақстанның рәміздерін құрметтеу, Атамекенді ардақтау сезімдерін дамыту;

- Туған жерін көркейтуге ат салысу , еліне адал қызмет етуге тәрбиелеу .

Көрнекіліктер : Қазақстан өлкесінің табиғаты туралы суреттелген

көріністер , бейнетаспалар ,

Шаттық шеңбері :

«Ауылым» әні . Сөзі мен әні Ә. Көкішбай

Әңгімелесу :

«Ойланайық, пікірлесейік» айдарымен берілген сұрақтар бойынша Атамекенді қадірлей білу, мақтаныш ету, баланың өз болашағын атамекенмен байланыстыруы бағытында әңгіме жүргізу .

1. Атамекен дегенде ойыңа бірінші не келеді ?

2. Адамның туған жері әрқашанда атамекен бола ма ?

3. Адамда екі атамекен бола ма ? Отан ше ?

4. Өз атамекенін сүйе білу адам өміріне қалай әсчер етеді ?

5. Сенің арман- қиялыңда атамекеніңе қандай орын берілген ?

6. Ел баласы атану үшін адамға андай қасиеттер қажет ?

7. Атамекенін анасындай сүю үшін адам қандай болуы керек ?

8. Туған жеріңде туып –өскен қандай азаматтарды мақтан етесің ?

9. Сенің қандай еңбегіңді елің мақтан еткенін қалайсын?

Атамекен ата –бабаның қоныс еткен мекені, Адам қай жерде жүрсе де , қандай биіктерге көтерілсе де , ол үшін ең қадірлі , қасиетті өлке- ол Атамекен. Адамның бір ғана атамекені болатындығына , ал ғаламдану дәуіріне сәйкес басқа мемлекеттерде тұрып, сол елдің азаматтығын алып, сол елді өзінің екінші отаны санайтын жағдайлар кездесетіндігін назар аударғаны жөн.

Атамекенді сүйе білген адамның бойында отансүйгіштік, жауапкершілік, сенімділік, батылдық қасиеттері дамиды. Атамекеннің көркеюі , гүлденуі , жаңарып , жаңғыруы сол жерде туып өскен азаматтарға, ұрпақтарға байланысты.

Мәтінмен жұмыс :

Менің ауылым

Менің туған ауылым.... Мен үшін оның маңызы қандай десеңізші ! Мен осы жерде туып- өстім, алаңсыз бақытты балалық шағымды өткердім. Мен өз атамекенімді бәз қалпында сүйемін.

Біздің ауылда пайдалы қазбалар жоқ, үлкен өнеркәсіп орындары да жоқ, зәулім үйлер де жоқ, оның есесіне көзтатарлық біздің Шежін өзені бар. Ежін ғасырлар бойы өмір нәрі, тазалық көзі болып келеді. Түрлі қиындықтар туған кезде ол бізге дем беріп отырды. Жазда егіндікті суарамыз, ыстықтап кеткенде біз солай қарай жүгіреміз. Қыста суаттан балық аулаймыз.

Біздің өзен адамға әрдайым серік болудан жалыққан емес. Біздің өзен жағалауында еспубликамыздан тыс жерге де танымал адамдар өскен. Адамдар -ауылымыздың асты байлығы. Халықаралық көрмелерде өз еңбегімен ауылымызды көркейтіп, байытып даңқын шығарған адамдардың есімдері талай рет аталды. Қазір бұл жерде сәулетті мектептер, ауруханалар, демалыс орындары салынған, сол сияқты керемет саябақ бой көтерді...

Атамекен.

Жалпы қазақ халқы мекен мәселесіне өте терең ілтипатпен қараған халық. «Атамекен» сөзі қазақ халқының сол жерді ерте кезден иемде-ніп келе жатқандығын білдірсе керек. «Кіндік кесіп, кір жуған», «кіндік қаны тамған» деген сөздер бар қазақта. Бәрі де өзінің тұрған мекеніне жылы жүрекпен , терең ілтипатпен қарағандықтан туған сөздер . Неміс халқында да «фатерланд» деен сөз бар. Тікелей қазақшаға аударғанда «атамекен» дегенді білдіреді. Орыстың «отечество» деген сөзі де ата –бабасына қарай мегзейді. Арабтың «уәтан» деген сөзі «отан» деген мағынада пайдаланылады, ал осының қазақша аудармасы - «мекен» . Әрбір ұлттың ұлт болып қалыптасқан жері сол ұлттың мекені саналадаы да, мекен мен ұлт арасында тамыры тереңде жатқан байланыс барлығы осыдан келіп туындайды.

Дәйек сөз

«Туған жер- тұғырың, туған ел- қыдырың»

Халық даналығы.

Ұлтарақтай болса да, ата қоныс жер қымбат.

Ат төбеліндей болса да , туып өскен ел қымбат.

Халық даналығы.

Сергіту сәті . Оқушылар көзімізді жұмамыз.

Күннің көзі жарқырап тұр. Айналаның барлық жап жасыл.

Шығармашылық жұмыс

Бұлттар тамшылар

Қорытындылау .