Отбасы – ұлттың тірегі, өзін-өзі тануға материал

Отбасы – ұлттың тірегі!

Отбасы – сыйластық, жарастық орнаған орта, кішкентай Отан. «Отан – отбасынан басталады» дегендей отанды сүю - отбасынан басталатыны рас! Себебі, отбасы – адам баласының өсіп – өнер, қаз тұрар, қанат қағар ұясы, алтын бесігі. Тәрбиенің кілті – отбасының өмір тіршілігіне байланысты. Әсіресе, ата – ананың адамгершілік бейнесі балаларды тәрбиелеудің негізгі көзі. «Қыран ұяда не көрсе, ұшқанда соны іледі» ғой. Бала өмірінің алғашқы күнінен бастап ата – анасының қамқорлығын көріп, яғни ол өзін қоршаған шынайы махаббаты сезініп өсуі керек екен. Сонда өмірге деген шынайы көзқарастары қалыптаса бастайды. Отбасының берік негізі осындай рухани мүдденің бірлігінде болмақ. Оның біртұтас әрі тату болуы, береке – бірлігі ең алдымен әке – шешенің бір – біріне, балаларына қалай қарайтындығына байланысты. Біз баланы сүйеміз, оларды барынша жақсылықтарға бөлейміз. Балаға бақыт дегеннің қайдан келетіндігін айтып, өмірде ненің және кімнің маңызды екендігін түсіндірген жөн. «Үлкендерге құрмет, кішіге ізет көрсетудің мәнін ашып көрсете білуіміз керек.

Ғасырлар бойы қалыптасқан, халық дәстүрлері мен салттарында, отбасы тәртібі солар арқылы қатаң реттеліп отырған. Мысалы: «Қызға қандай киім лайықты, шашы бір өрім бе, әлде екі өрім етіп өру дұрыс па, оны шашбаумен сәндеу керек пе, не орамалдың, не кимешектің астына жасырып қойған жөн бе?» дейтін жайларды жіктеген. Ал, қазіргі таңда қыздарымыздың кіндігін көрсетіп жүруі, жарассын – жараспасын киімдерді киюі, өміріміздің бір бөлшегіне айналғанын жасыра алмаймыз. Баланың жақсы адам болуы тек ғана өмірдің ағымынан қалмай киіну ғана емес, ең негізгісі өмірден өз орнын таба алатын азамат ретінде тәрбиелеу жағы ақсап жатады. Біздер әр баланың жүрегінде мәдениеттің сәулелерін сезініп өссе, атаның тәлімін естіп, батасын алса, әженің аңыздарын, ертегілерін естіп, жаны жақсылықтарға қанығып өссе, біздің болашақ ұрпақтарымыз білім шыңына шықпай ма? Ал, білімді ұрпақ қашанда да жолынан жаңылмайды.

Ұрпақ – болашақ, ол адамзаттың болашағы, ал отбасы – кішкене мемлекет.