Отбасындағы қуаныш ашық сабағы мектепке дейінгі балаларға

Сабақтың тақырыбы: «Отбасындағы қуаныш»

Сабақтың мақсаты: «Отбасы» құндылығының маңыздылығын ашу.

Сабақтың міндеттері:

-отбасы туралы түсініктерін кеңейту.

-отбасына деген жағымды қарым-қатынастарын дамыту.

-отбасына деген сүйіспеншілікке тәрбиелеу.

Көрнекі-құралдар: «Өзін-өзі тану» әлемінің картасы, отбасы суреті, плакатқа салынған жүрекше және күннің көзі, фотосуреттер.

Музыка әуенімен кіреміз.

Ән: «Балалықтың бал әні»

Әңгімелесу

-Бүгін «Өзін-өзі тану» әлемінің «Отбасындағы қуаныш» аялдамасына тоқталамыз. Бұл жерде бізді қызықты ойындар, тапсырмалар күтіп тұр. Ал біз бүгін өзіміздің туған үйіміз, отбасымыз туралы әңгімелесеміз.

Өзіммен-өзім (музыка әуені ойналады)

-Балалар жайланып отырып, көздеріңді жұмып өздеріңнің отбастарыңды, үйлеріңді көз алдарыңа елестетіңдер.

Үйіміз қандай әдемі. Бөлмеміз жайлы, жинақы. Бөлмедегі әр нәрсе өз орнына қойылған.

Асқар таудай атамыз, мейірімді әжеміз, ақылды әкеміз, қамқор анамыз, ағамыз, әпкеміз, ініміз, қарындасымыз дастарқан басына жиналыпты. Бәрі саған мейірлене, сүйіспеншілікке толы көздерімен қарайды. Қандай тамаша! Бәрі бақытты, көңілді!

Көздеріңді жайлап ашып, ойларың, сезімдеріңмен бөлісейік.

Балалардың жауаптары тыңдалады.

Сурет бойынша әңгімелеу

-Балалар, бұл суретте не көріп тұрмыз? Отбасы.

-Кімдерді? Ата, әже, әке, ана, аға, әпке, т.с.с.

-Өз отбасы туралы не айта аласыңдар?

Отбасымызды біз өте жақсы көреміз. Отбасындағы адамдарды жүрегімізде сақтап жүрейік. Ол үшін мынау жүректі сүйікті адамдармен толтырайық.

Сергіту сәті: «Бір оңға, бір солға» музыка әуенімен жасалады.

Біздің отбасымыз бақытты, көңілді болу үшін, біз бәріміз бір дастарханда жиналамыз.

-Қандай отбасындағы мерекелерді сендер білесіңдер?

Туған күн, жаңа жыл мерекесі, 22-наурыз жаңа жыл, аналар мерекесі т.с.с.

-Қандай мереке келе жатыр? Аналар мерекесі.

-Қандай мерекені сендер өте жақсы көресіңдер?

-Мына фотосуреттерде қандай мерекелер?

Ойын: «Тату-тәтті отбасы»

Тәрбиеші балаларға әр отбасының құрамы әр түрлі болатынын айтады. Балалар тәрбиешіні: «Тату-тәтті отбасында 3 адам, 4 адам, 5 адамнан т.с.с. тұрады» деген нұсқауы бойынша айтылған санға сәйкес тез топтасып, бір-бірімен құшақтасады.

Ғажайып сөздер

Балалар өз отбасымыз туралы қандай әдемі сөздерді білеміз, кәне айтайықшы.

-Адамға ең қымбат-отбасы.

-Отбасы-сенің ең жақын адамдарың.

-Менің отбасым бақытты.

-Отбасымдағы әрбір сәтім қуаныш сыйлайды.

-Менің отбасым тату.

Қорытынды