Өз елімнің патриотымын 2 сыныпқа тәрбие сағаты

Тақырыбы: Алдымен сүй, ардақта ата-анаңды!

Мақсаты: Бала бойына сүйіспеншілікті, жылылықты ұялату, ата-анасын құрмет тұтып, адал да парасатты ұл мен қызы болуға, ата-ана берген жақсы үлгілерін нәтижелі етуге тәрбиелеу; Ата-аналардың бала тәрбиесіндегі жауапкершілігін арттыру, отбасындағы тәрбиенің маңыздылығын, алатын орнын айқындау; оқушыларды ата-ананы құрметтеуге, сыйлауға тәрбиелеу.

Көрнекілігі: Нақыл сөздер, мақал-мәтелдер, видеороликтер, суреттер.

Әдісі: ақыл-кеңес, пікірсайыс, өмірлік тәжірибе үлгісі

Тәрбие сағатының барысы: Жоспары: 1.Психологиялық даярлық 2.Кіріспе сөз 3.Анаң –сенің пейішің (видеоролик) 4.Көрініс 5.Ана туралы өлең шумақтары 6.Тренинг оқушыларға 7.Тренинг ата-аналарға 8.Шығармашылық топтық жұмыс оқушыларға 9.Шығармашылық жұмыс ата-аналарға 10.Ата-ана туралы хадистер не дейді? І. Ұйымдастыру Психологиялық даярлық: «Динамикалық шеңберлер» әдісі арқылы оқушылар екі шеңберге бөлініп, бір-біріне тілек айтады.

Мұғалімнің кіріспе сөзі:

Ата-ана - әрбір адамның қайтып соғар қазығы. Оған деген сүйіспеншілік тек жүректен шығу қажет. Әсіресе, тіршіліктің қайнар көзі, махаббаттың шуақ күні, мейірімнің кәусар бұлағы – Ана есіміне қатыссыз дүниеде ештеңе жоқ. Халқымыздың байырғы ұғымында баланың ата-ана алдындағы парызын өтеуі- «Ана сүтін ақтау» деп аталады.«Әкеге бағыну – тәңірге бағыну» деп әкені одан бетер дәріптеген. Бала тәрбиесінде ата-ананың алар орны ерекше. Ата-ана баласына

саналы тәрбие беріп, оның болашағына зор үмітпен қарайды. Өкінішке орай, қазіргі заманда ата-анасы мен ұстаздардың берген тәрбиесін жоққа шығарып, өмірден опық жеп жатқандар қаншама. Балалардың мектеп партасында отырып, оқушыға, қоғамға жат қылықтармен айналысуы бұл - кезек күттірмейтін мәселелердің бірі. Біздің оқушыларымыз осындай жат қылықтардан аулақ болып, саналы, тәрбиелі, білімді ұрпақ тәрбиелеу мақсатында осы тәрбие сағатының мәні зор деп сенемін.

Анаң сенің - пейішің (видеоролик) Осы видеороликті тамашалау барысында біз қандай ой түйдік? / Оқушылардың пікірі /

Көрініс: «Қарт пен бала әңгімесі»

Баласы: -Ата,ата, маған сұрақ қойыңызшы. Атасы: -Балам, үйдің алтын қазығы кім? Баласы:- Ата, үйдің алтын қазығы-бала. Атасы: -Жоқ балам, үйдің алтын қазығы-ана. Ана ақылды болса, бала дана болады.Ана тәрбиесі-қызға үлгі, әке тәрбиесі-ұлға үлгі. Ана- ақылшың, әке- қамқоршың, аға-қорғанышың, інің-сүйенішің, қарындасың- қанатың екенін ұмытпа. Атасы:-Балам , жоқты бар, ашты тоқ ететін кім? Баласы: -Ата, жоқты бар, ашты тоқ ететін-мейірімді әке. Атасы:-Жоқ,балам, әке қанша мейірімді болса да ананың жаны бөлек. Ашты тоқ, жоқты бар ететін ол-ана. Анасыз бала ұйықтамайды, қатықсыз айран ұйымайды. Атасы: Ал, балам, өмір сүруүшін не қажет? Баласы: — Ата, өмір сүру үшін алтын, ақша, мал қажет. Атасы: — Жоқ, балам, өмір сүру үшін су,от, тұз, қыз, ақыл қажет. Су-тіршіліктің нәрін береді, от-өмірге жалын береді, тұз-астың дәмін келтіреді, қыз-өмірдің сәнін келтіреді, ақыл- өмірдің мәнін келтіреді.

Мұғалім:

Адам барма, ана сүтін татпаған,

Алуан-алуан ауыр сынды аттаған.

Адалдықты, ар-намысты сақтаған,

Мен ананың сонысына мақтанам.-деп ақындар жырлағандай , қымбатты да аяулы аналарымызға арналған жыр шумақтарына кезек берейік

(Оқушылар ана туралы жаттаған өлеңдерін оқиды)

Әрі қарай тәрбие сағатымызды қызықты тренингпен жалғастырсақ

Тренинг: І. Оқушыларға: 1. «Мен үшін қымбат...?» 2. «Ата-анаңызды неге теңер едіңіз?» ІІ. Ата-аналарға қызықты сұрақтар: (Тапсырмаға тез жауап беру керек)

1. Балаңыздың туған күні, айы, жылы? 2. Балаңыздың алғашқы ұстазы? 3. Сынып жетекшісінің толық аты-жөні? 4. Балаңыздың парталас көршісі кім? 5. Балаңыз қандай өлшемді аяқ киім киеді? 6. Балаңыз қандай түстерді ұнатады? 7. Балаңыз 1-сыныпқа қай жылы барды? 8. Балаңыз болашақта кім болғанын армандайды? 9. Балаңыздың сүйікті ісі? 10. Сыныптағы сынып сағаты аптаның қай күні болады? 11. Балаңыздың үлгі тұтатын адамы? 12. Кеше қандай сабақтар болды? 13. Балаңызды еркелетіп қандай сөздер айтасыз? 14. Балаңыздың ең жақын досы кім? 15. Балаңыздың оқитын газет-журналдарын атаңыз? 16. Бос уақытын қалай өткізеді? 17. Балаңыз қай пәнді жақсы көреді? 18. Балаңыздың арманы не?

ІІІ. «Жүректен шыққан жылы сөздер»

1. Сіз балаңызды таңертеңгі ұйқыдан қалай оятасыз? 2. Балаңызға ризашылығыңызды қалай білдіресіз? 3. Балаңыз сізге қандай көмек көрсетеді?