Қайырымдылық жасасаң, қайырымын көресің мақаласы

«Қайырымдылық жасасаң, қайырымын көресің»

Мемлекет басшысының «Болашаққа бағдар: рухани жаңғыру» атты мақаласында туған жеріне көмек жасаған жандарды қолдау керектігін атап көрсеткен болатын. Бұл жақсылық жасап, жомарт жүрек атанған азаматтарды халық білсін деген ойдан туындаса керек.

Өзге адамдарға қамқорлық танытып, жан жылуымен бөлісу, көмек көрсету – кез келген адамның қолынан келе бермейтін іс. Дегенмен қоғамда қайырымдылық танытуды өмір салтына айналдырған адамдар да жоқ емес. Міне, сондай жандардың бірі – Сұлтанов Талғат . Ол – Хромтау қаласындағы ЖШС «Сұлтанов» кәсіпорын басшысы. Жас кәсіпкер 2002 жылдан бастап кәсібін қолға алып, еңбекке ерте араласады. Ізденімпаз, еңбексүйгіштік қасиетінің арқасында «Дәстүр» мейрамхана желісін ашты.

«Қайырымдылық жасасаң, қайырымын көресің» деген ұстанымды ұстанатын жас кәсіпкер ауданда өтетін қайырымдылық шараларынан қалыс қалған емес. Тұрмысы төмен отбасыларына қамқорлық танытып келеді. Ол 12 адамды тұрақты жұмыспен қамтып отыр. Жыл сайын «Мектепке жол» акциясы аясында Оңғар орта мектебінің тұрмысы төмен отбасыларынан шыққан балаларды мектепке қажетті оқу-құралдарымен және формалармен қамтамасыз етуді дәстүрге айналдырған. Сондай-ақ, метепте өткен қайырымдылық шарасында 12 балаға азық-түлік пен тәттілер үлестірілді. Талғаттың айтуынша, тынымсыз еңбектің арқасында кез келген жетістікке жетуге болатынын, сонымен бірге үнемі өзін-өзі жетілдіріп отыру маңызды роль атқарады екен. Iскер кәсіпкер мұнымен тоқтап қалмай, алдағы уақытта да үлкен жобаларын жүзеге асыруды көздеп отыр

«Еңбектің наны тәтті» деп тегін айтылмаған. Маңдай термен, адал жолмен шаруасын дөңгелентіп отырған кәсіпкер еңбек етіп, жемісін көрген жандарды үлгі тұтады.

Міне, адамға адамның қадірі осындайда білінеді. «Нарық заманы орнады, адамдардың адамгершілік қасиеті төмендеді, азайып барады» деп жиі айтып жүрсек те, осындай нар жігіттердің жасаған жақсылықтары көкейге үміт ұялатады. Қайырымдылық ірі-ұсақ болып бөлінбейді. «Кең болсаң, кем болмайсың» – қайырымды болу міндетің деген ойға жетелейді

Г.К.Танзенова

Оңғар орта мектебі