Қазақ елі дамудың даңғыл жолында мақаласы

ТАҚЫРЫБЫ: Қазақ елі – дамудың даңғыл жолында

ЖОСПАР

КІРІСПЕ

Тәуелсіздік – бабалар аманаты

НЕГІЗГІ БӨЛІМ

Қазақ елі – дамудың даңғыл жолында

Қазақ елі дамуының рухани бағдары

ҚОРЫТЫНДЫ

Тұғырлы тәуелсіздік – ең қымбат құндылық

ӘДЕБИЕТТЕР ТІЗІМІ

ҚАЗАҚ ЕЛІ – ДАМУДЫҢ ДАҢҒЫЛ ЖОЛЫНДА

«Мен барша халқымды жарқын болашаққа жол бастайтын

адамзат баласының мәңгілік құндылықтары ерік-жігер мен

еңбек сүйгіштік, мақсаткерлік қасиеттерді бойға сіңіруге шақырамын. Мен ХХІ ғасыр Қазақстанның «алтын ғасыры» боларына сенемін. Бұл бейбітшіліктің, тұрақтылық пен гүлденудің ғасыры болады. Қазақстан халқы ұлы тарихтың иесі атануға лайық. Біз көздеген мақсатымызға міндетті түрде жетеміз»

Н.Ә.Назарбаев

Ұлттық бірлік пен татулық, бейбітсүйгіштік пен еркіндік – мемлекеттік тұтастығымыз бен тәуелсіздігіміздің ең үлкен құндылықтары. Ел басына күн туған сын сәттерде тапқырлығын да, табандылығын да танытып, даналығымен, батырлығымен, парасаттылығымен ел мұңын, халық сырын, тарих үнін түсіне білген бабаларымыз бір кездері: «Күлдір-күлдір кісінетіп, күреңді мінер ме екеміз, Күдеріден бау тағып, кіреуке тон киер ме екеміз...» [1,78]- деп армандап еді. Ғасырлар үнімен сабақтасқан игі мұраттар мен армандар бүгінде орындалып, шаңырағымызды тіктеген егеменді, тәуелсіз мемлекет болып қалыптастық. Осы тұрғыда әлеуметтік өмірде өте үлкен маңызға ие жалпыадамзаттық және ұлттық құндылықтарымыз тәуелсіздігіміздің темірқазығы іспетті.

Сан ғасыр бойы бабалар аңсаған тәуелсіздік ұғымы – қазақ халқының бостандыққа ұмтылған асқақ армандары мен қайсар рухының жемісі. Тәуелсіздік сөзінде қаншама ерлік, батырлық, елген деген сүйіспеншілік сезімі жатыр. Әрине, халқымыз үшін тәуелсіздік таңы оңай ата қоймағаны рас. Алайда дана да батыр бабаларымыздың ерлігі арқасында бүгінгі күні осындай бейбіт елдің шаңырағында тату-тәтті өмір сүріп отырған елміз. «Тарихи болашағына деген үмітсіздік ұлттық мінез-құлықты күйретіп, қадір-қасиетін шайды, қазақ халқының небір данышпан перзенттері мен көсемдері тарихтың қарғыс атқан тұзағында тұншықты, ұлттың амандығы үшін олардың тарихтың тәлкегіне көнуге мәжбүр болды» [2,16]- деп Елбасымыз Н.Ә.Назарбаев өз еңбегінде көрсеткендей, халқымыз елдік жолында ерліктің ерен үлгісін көрсетті. Жас мемлекетіміз тәуелсіздік алған аз ғана уақыт ішінде көптеген ірі экономикалық, саяси және әлеуметтік жетістіктерге қол жеткізді. Республикамыз көптеген әлемдік қауымдастықтың беделді мүшесі болып, ішкі және сыртқы жүйесі тұтастай өзгеріп, жан-жақты дамыған мемлекеттермен байланыс жасай басады.

Біздің еліміз өзінің қалыптасу жолында дамушы ел ретінде бірталай экономикалық, сонымен қатар әлеуметтік қиындықтарға тап болып келді. Экономиканың құрылуы, инфрақұрылымды дамыту, әлеуметтік сала, денсаулық сақтау мен білім беру жүйесін жетілдіру – бұл жас мемлекетіміздің ең негізгі орындайтын міндеттерінің бірі еді. Осыған байланысты сын сағатта сауатты стратегиялық жоспарлаудың маңызы өте үлкен болатын.

Тәуелсіздігіміздің ең алғашқы күндерінен бастап Елбасы Н.Ә.Назарбаев мемлекетіміздің дұрыс даму жолын таңдап, қазақстандықтардың қазіргі нарық заманының, бүгінгі өміріміздің барлық салаларында нақты және пайдалы нәтижеге қол жеткізуге үндеді. Сондықтан да қалыптасқан Қазақстанның бүгінгі келбеті – геосаяси маңызы зор, жетістіктері мен талпыныстарын әлем таныған, бейбітшілік пен толеранттылықтың жарқын үлгісі іспеттес. Ең бастысы, еліміздің өзіндік дамудағы болашағы мен әлеуеті мол. Оның дәлелін қазақстандық жастардың білім, ғылым, өнер, спорт, мәдениет, руханият т.б. салаларындағы аймақтық және әлемдік деңгейдегі талпыныстары мен нәтижелерінен анық танимыз. Бұл – біздің еліміздің даму бағытының көпвекторлы болуында, яғни адамзат баласына ортақ құндылықтар мен ұлттық құндылықтарымыздың қазақ топырағындағы үйлесім таба білуінде.

Мемлекет басшысының 2017 жылдың басында халқымызға жолдаған "Болашаққа бағдар: рухани жаңғыру" бағдарламалық мақаласы қоғам тарапынан үлкен қолдауға ие болып, талқылауға түскен, ішкі және сыртқы саясаттағы рухани даму бағыттарымызды айқындаған мақала болатын. Онда Елбасымыз: «Еліміз жаңа тарихи кезеңге аяқ басты. Мен жыл басындағы халыққа Жолдауымда Қазақстанның үшінші жаңғыруы басталғанын жарияладым.

Осылайша, біз қайта түлеудің айрықша маңызды екі процесі – саяси реформа мен экономикалық жаңғыруды қолға алдық.

Біздің мақсатымыз айқын, бағытымыз белгілі, ол – әлемдегі ең дамыған 30 елдің қатарына қосылу.

Аталған екі жаңғыру процесінің де нақты мақсат-міндеттері, басымдықтары мен оған жеткізетін жолдары бар. Мен көздеген жұмыстарымыздың бәрі дер уақытында және барынша тиімді жүзеге асарына сенімдімін. Бірақ, ойлағанымыз орындалу үшін мұның өзі жеткіліксіз.