Қазақстан халықтарының тілдер күніне құттықтау сөз

Қайырлы күн құрметті қонақтар, жалынды жастар!

5 қыркүйек – Қазақстан халқының тілдер күні мерекесі құтты болсын! Ұлтымыздың рухани көсемі, тіл ғылымының негізін қалаған ғалым, публицист, ақын А.Байтұрсынұлының 145 жылдық мерейтойына орай өткізіліп отырған мерекелік іс-шараға қош келдіңіздер!

Жалпы елімізде 130-дан астам ұлт пен ұлыс болса, сонша тіл бар. алайда, Қазақстан мемлекетінде «ақпыз, қара, сарымыз, ағайынбыз бәріміз» деп тату-тәтті өмір сүріп келе жатқанымыз мені қатты қуантады. Бүгінгі мереке де сол қуаныштың көрініс десем, артық айтпаспын.

Көк тудың астында бірге тұрып, әрбір ұлт бір-біріне деген құрметін көрсетіп, сыйластық танытып жатқанға не жетсін, шіркін!

Тек Ата Заңымызда жазылғандай, қазақ тілінің – мемлекеттік тіл екенін естен шығармауымыз керек! Кім қай ұлттан болса да, мемлекеттік тілді меңгеруі тиіс!

ХХ ғасырдың басында ғалым Ахмет Байтұрсынұлы «Ұлттың жоғалуына себеп болатын нәрсенің ең қуаттысы – тіл. Сөзі жоғалған ұлттың өзі де жоғалады» деген екен. Мен өзімнің туған тілімді – халқымның кешегі жүріп өткен жолын, бүгінге жалғасқан ғұмырының ертеңге апарар мүддесін бейнелейтін ең басты қазынамыз деп білем. Сондықтан да біздер оны құрметтеп, қолдап, аялау керекпіз.

Тәуелсіз еліміз басқа елдермен иығын тең тіресер кезеңде мені тіліміздің қазіргі жайы толғандырады. Өкінішке орай, әлі күнге дейін ана тілін білмейтін қандастарымыздың саны азаймай тұр. Ана тілін біліп тұрып, өзге тілде сөйлейтіндер жайлы не деуге болады?

Әрине, өзге тілді игеруге ешкім тыйым салып жатқан жоқ, ең алдымен, ана тіліміздің мерейін үстем етіп алып, одан әрі «жеті жұрттың тілін біліп, жеті түрлі білім» ал, не болмаса «Өзге тілдің бәрін біліп, өз тіліңді құрметтесең» сенен асқан ұлтжанды, отаншыл, рухы биік жан болмас еді! Міне, осыны меңзеп, «Маса» болып ызыңдады емес пе Ұлт көсемі Ахмет Байтұрсынов, «Оян, қазақ!» деп жар салмап пе еді Міржақып Дулатов.

Көпке топырақ шашпаймын, бірақ өзге тілдің шашпауын көтеріп жүрген қандастарымыз ертерек есін жинап, елінің ертеңінің жарқын болуына үлестерін қосса екен деймін.

Осы орайда, өзге ұлттарға мемлекеттік тілді үйрету жолында жұмыс жасап жатқан Арқалық қаласы әкімдігінің қалалық тілдерді орталығының басшысы Баян Саруарқызы мен оның ұжымына ризашылығымды білдіргім келеді. Жыл сайын мемлекеттік тілдің қолданыс аясын кеңейтіп, насихаттауға бағытталған «Тіл-парасат», «Тілдарын», «Абай атындағы көркемсөз оқу шеберлері», «Мемлекеттік тіл – мемлекеттік қызметте» тағы сол сияқты байқауларды…