Рухани жаңғыру болашаққа батыл қадам эссесі

Рухани жаңғыру - болашаққа батыл қадам.

Әр ұлттың ұлт болып қалыптасқан мекені, алтын ұясы бар. Оны алақанына салып аялай білу адамгершіліктің жоғары деңгейі деп білемін .

«Атамекен» сөзі халықтың сол жерді ерте кезден иемденіп келе жатқандығын білдірсе керек . Қазақта «кіндік кесіп, кір жуған», «кіндік қаны тамған» деген сөздер бар. Бәрі де өзінің тұрған мекеніне сүйіспеншілікпен, терең ілтипатпен қарағандықтарынан айтылған сөздер.

Менің алғаш кіндік қаным тамған жерім – жазиралы кең даласымен, жұпар иісі аңқыған ауасымен, асқар-асқар белдерімен, айдын шалқар көлдерімен, тілегей терең теңізімен, сарқыраған айна бұлағымен тамсандырған – Қазақ елі. Сонау атам заманнан бабаларымыз жанын қия қорғаған атамекен бүгінде әлем таныған тұтас бір жеке мемлекет .

Туған жер – әр адамның өміріндегі киелі орын алады. Әр адамға туған жері, Отаны, туып өскен өлкесі әрқашанда қымбат. Бұл өмірде сәби шыр етіп дүниеге келгеннен бастап оған бұл жер өте ыстық, тіпті өз анасындай болуы тиіс.

«Туған елің-шежірең» демекші адам баласы өз туған жерінің өмір тарихын білуге тиіс. Қазақтың жоғары адами қасиеттері бойына табиғатынан біте қайнасқан. Кең даланың құдіреті ұлтымызға рух бергендей ...

Көреген хандарымыз, қызыл шешен билеріміз, ел қорғаған батырларымыз ұрпағы үшін жанын аямай шайқаса білді. 1991 жылы еліміз өз алдына егемендік алып, тұңғыш Тәуелсіз ел дүниеге келді . Бұл қандай үлкен шексіз бақыт десеңші !

Ата-бабамыздың асқар таудай ақылы, өз өмір тәжірибесінен өткен өнегелі істері –елін, жерін қорғау, бірлікте, ыңтымақта өмір сүріп, еліне елеулі, халқына қалаулы болу сияқты жақсы қасиеті ұрпақтан-ұрпаққа дарыса ел іргесі мығым да, берік болары анық.

Қазақстан –көп ұлтты мемлекет. Бейбітшілік пен достастықта, татулықта жарасып өмір сүруде. Адам баласының татулыққа ұмтылуы әр халықтың қанынада бар, әсіресе ол қазақстандықтарда ерекше дамыған. Бұл қазақ жерінің жомарттылығынан, осы жерге тағдыр алып келген баршаға құшағын кең жайып, пейілін кеңге салатын қазақ халқының мінезінен жаралған. Қазақстан тұрғындары қазақ халқының тілін, тарихы мен салт-дәстүрін білуі керек. Халықтың татулығы мен бірлігінің мәні осында. Мемлекеттік тіл –тәуелсіздік белгісі екені баршаға аян. Менің ана тілімнің қазақ тілі екенін мақтан етемін. Қазақ тілі өте бай тіл. Оны мен ақын-жазушы аталарымның шығармаларын оқып, тамсандым. Тілдің осыншама құдіреттілігін сөзбен айту мүмкін емес. Әдебиетімізде өшпес із қалдырған, тұғыры бөлек тұлғалар қаншама!