Рухани жаңғыру – сананың жаңғыруы туралы мақала

«Рухани жаңғыру – сананың жаңғыруы»

Елбасы Н.Ә.Назарбаевтың «Болашаққа бағдар: Рухани жаңғыру» атты мақаласы стратегиялық маңызға ие, жасампаз халқымыздың жарқын болашағын айқындайтын қазақстандықтардың ой-санасы мен дүниетанымын өзгертетін қозғаушы күш. Елбасының мақаласын оқып шығып, осындай тұжырымдамаға келдім. Бұл – қазақтың барлық ұлттық салт-дәстүрлерін, ең бастысы, мемлекеттік тіліміз бен әдебиетімізді, мәдениетімізді, қазақи рухымызды жаңғырту. Өскелең ұрпақтың бойына елжандылық, ұлтжандылық қасиеттерін сіңіріп, ұлттық құндылықтарымызды ұмытпай, жаһандық жаңашылдыққа жетелейтін жол. Қазіргі қоғам көзқарасы қалыптасқан зерделі де, зерек тұлға тәрбиелеуі тиіс. Ол үшін ілім-білімге ұмтылып, жан-жақты жетілген жөн.

Сондықтан да мақала қоғамдық-саяси және мәдени-ағартушылық жобалар ретінде бірқатар шаралардан тұратыны өте маңызды. Ұлт көшбасшысы атап көрсеткен бұл шаралар еліміздің дамудың жаңа деңгейіне көтерілуіне өз септігін тигізетініне сенімдіміз. Елбасы Н.Ә.Назарбаевтың «Болашаққа бағдар: рухани жаңғыру» атты бағдарламалық мақаласын кітапханашылар да ықыласпен түйсіне оқып, дөңгелек үстел басында қызу талқылады. Өзін қоғамның бір бөлшегі санайтын әрбір кітапханашы мақалаға қатысты өз ойларын білдіріп, мақаланың болашақ үшін маңызына тоқталған болатын.

Басқосуға аудандық кітапхананың кітапханашылары мен мәдениет және тілдерді дамыту бөлімінің қызметкерлері қатысты. Дөңгелек үстел басында «Жангелдин ауданының мәдениет және тілдерді дамыту бөлімі» ММ-нің бас маманы Қанат Омар сөз сөйлеп, патриоттық тәрбие мәселелері, латын әліпбиіне көшуі – қазақ тілінің жаңа белесі, ел болашағын баянды етуге бағытталған бағдарламасының ұлтымыз үшін аса маңыздылығы, өнегесі өрелі екендігі жайлы пайымды пікірлері мен тұжырымды ойларын ортаға салды.

Дөңгелек үстел барысында ОКЖ-ның директоры Роза Қабдуалиева рухани байлығымен халықты қайта қауыштырып, қоғамдық санада ұлы мұраларымызды, ұлттық құндылықтарымызды жаңғырту басты мақсатымыз, көрсетілген міндеттер мен тапсырмалар негізінде жұмыс жасау керек екендігін тілге тиек етті. Мұнан соң сөз кезегін алған балалар кітапханасының кітапханашысы Сәуле Омарова, бұл орайда болашақты бағдарлаған, кемел келешекке көз тастаған Елбасының мақаласы мемлекетке жол бастар темірқазық екендігін айтып өтті. Сонымен бірге балалар кітапханасында оқырмандарға жол тартқан «Рухани жаңғыру – ұлттың жаңғыруы» атты кітап көрмесін айта кетті.

Кітапхананың библиографы Майра Нұрғазина еліміздің дамыған 30 елдің қатарына қосылу кезіндегі рухани байлығымыздың үлесін көбейтіп, оны күшейту керектігін, өйткені бәсекеге қабілетті болу тек қана экономикаға байланысты емес, қазақ мемлекетінің мыңдаған жылғы тарихымыздағы құндылықтардың барлығы біздің бойымызда болуы керектігіне тоқталып өтті. Дөңгелек үстел барысында келелі ойлар айтылып, «Цифрлы Қазақстан», «Латын әліпбиіне көшу», «Мәдени мұра», «Туған жер», «Қазақстанның қасиетті рухани құндылықтары» немесе «Қазақстанның киелі жерлерінің географиясы» атты тақырыптар талқыланды. Келешекте ұлтымыз табысты болуы үшін әрбір қазақстандық бәсекеге қабілетті, сана-сезімі жоғары, білімді, сауатты болуы, ұлттық кодты, мәдениетті сақтап, жаңа заман жетістіктерін бойға сіңіріп, мақалада айтылғандарды іс жүзіне асыруға барлығымыз атсалысуымыз қажет деп, дөңгелек үстел қорытындыланды.

Мемлекетіміздің ең басты мақсаты — елімізді дамыған 30 елдің қатарына енгізу екені белгілі. Осыған орай Елбасының «Болашаққа бағдар: рухани жаңғыру» бағдарламалық мақаласын қолдау мақсатында кітапхананың оқу залында «Мәңгілік елдің – ұлы тарихы» атты жылдық кітап көрмесі жасақталып, оқырмандарға таныстырылды .