Спорттық үйірме-салауатты ұрпақ тәрбиесінің негізі

Тақырыбы: Спорттық үйірме – салауатты ұрпақ тәрбиесінің негізі

Авторы: Айтқұлова Мейрамгүл Даниялқызы, №74 ЖББОМ қосымша білім беру педагогы

Қосымша білім – оқушының жан-жақты дамуына ықпал ететін маңызды сала. Әсіресе, мектептегі спорттық үйірмелер балалардың физикалық және психологиялық тұрғыдан шынығуына, тәртіпке бағынуына, мақсатқа ұмтылуына жол ашады.

Мен, Айтқұлова Мейрамгүл Даниялқызы, №74 жалпы білім беретін мектепте қосымша білім беру педагогы ретінде мектептегі спорттық үйірмелердің жұмысын ұйымдастырып, бақылап келемін. Бұл бағыттағы жұмыс – мен үшін тек кәсіби міндет емес, жүрек қалауымен атқаратын жауапты іс.

Спорт – тек денені шынықтыру ғана емес, ол – табандылық пен жігердің мектебі. Спорт үйірмелеріне қатысқан оқушылардың бойында көшбасшылық қасиеттер қалыптасып, өзіне деген сенімі артады. Олар жарыстарға қатыса отырып жеңіске ұмтылуды, ұтылса – мойымай, қайта күш жинауды үйренеді.

Мектебімізде футбол, волейбол, үстел теннисі, ұлттық ойындар сияқты бағыттарда үйірмелер жұмыс істейді. Бұл үйірмелерге қатысушы оқушылар түрлі деңгейдегі жарыстарға қатысып, жүлделі орындар иеленіп жүр. Үйірме жұмысы арқылы оқушылар бос уақыттарын тиімді пайдаланып, өз денсаулығына да жауапкершілікпен қарауға үйренеді.

Қазіргі таңда оқушылардың дене белсенділігін арттыру – ұлттық деңгейдегі маңызды мәселе. Осы тұрғыдан алғанда, мектептегі спорттық үйірмелердің орны ерекше. Менің басты мақсатым – салауатты ұрпақ тәрбиелеу жолында спорт арқылы оқушының тұлғалық дамуына үлес қосу.

Қорытынды: Қосымша білім беру – шәкірттің шынайы қабілетін ашуға мүмкіндік беретін кең өріс. Спорттық үйірмелер арқылы балалар тек физикалық тұрғыда емес, рухани жағынан да шыңдалып, болашаққа сенімді қадам басады.