Тәрбиешінің жұмысы туралы эссе портфолиосы

Эссе

«Бала туғанда ақ қағаздай болып туады,

оның үстінде шимайды қалай салсаң,

қағаз бетіне солай түседі,бала тәрбиесі

сол сияқты, өзің қалай тәрбиелесең,

ол солай тәрбиеленеді»

Жан Жак Руссо

Әлемде көптеген мамандықтар бар, олардың барлығы қызықты және қажет. Бірақ әр адам өзіне жақын, жүрек қалауы бойынша таңдауы керек. Мамандық таңдау – адам өміріндегі басты қадамдардың бірі. Қаншалықты сәтті таңдау жасалса, соншалықты адам өмірі қызықты, әрі толыққанды болады.

Менің мамандығым - тәрбиеші. Бұл мамандық мені әрдайым белсенді және дені сау болуға жетелейді.

Мен №17 «Көктем» бөбекжай-бақшасына 2017 жылдан бастап жұмысқа орналасып, кішкентай бөбектерді тәрбиелеп келемін. Басында маған қиындау болды. Көп ұзамай тәрбиелеп жатқан балаларыма бауыр басып қалдым. Әр күні олардың сүйкімді жүзін көргенде көңіл-күйім көтеріледі.

Бала тәрбиесі, оның ішінде балабақшадағы сәбилерді тәрбиелеу үлкен мәртебе. «Адамды тәрбиелеу – демек, оның ертеңгі қуанышқа ие болатын келешек жолын тәрбиелеу» деді А. С. Макаренко. Сондықтан біз балаларымыздың болашағына, тәрбиесіне жауапты жандармыз. Осынау мамандықтың қызығы мен қиындығын өзі бала ортасында жүрген жан ғана түсіне алады. Таңғажайып балалар әлемімен тереңірек танысып, өз өмір тәжірибемнің мейірімінің дәндерін қондыру — менің жұмысымның мәні деп ойлаймын.

Жұмысым күрделі де қызықты. Балалармен жұмыс жасағанда уақыт тез, әрі байқаусыз өтеді. Бүгін тәрбие мен білім беру функциялары өзгерген жағдайда тәрбиеші-педагогтың кәсіби-педагогикалық құзыреттілігіне қойылытын талаптар да өзгерді. Тәрбиеші ән айта білуге, би билеуге, сонымен қатар жаңа озық техналогияларды меңгеріп жұмыс барысында пайдалана білу тиіс.Тәрбиеші баланың адам болып қалыптасуына, жан-жақты дамуына ықпал етеді. Мен өз мамандығымды ары қарай жалғастырып, жетілдіре түскім келеді.

Менің мойнымдағы міндетім де, мамандығының киесі де, қиындығы да осы періштелерді үлкен өмірге, қиындығы көп өмірге даярлап, қанаты қайырылмайтындай етіп тәрбиелеу! Әр бала жеке индивид, оның әр қайсысына өз кілтін табу керек. Бұл осы мамандықтың негізі десе де болады. Оларды алдау мүмкін емес, олардың сыншыл да шынайы көздері барлығын байқап қалады.