Төтенше жағдай кезіндегі қашықтан өткен тәжірибе туралы мақала

Қашықтан өткен тәжірибе

Ұстаздық-ұлы мамандық, бала дүние есігін ашқан соң ата-анасы бағып-қағып, әлпештеп аяласа, ес біліп, ер жетіп, етек жинаған соң ұстаздың алдынан өтеді. Ұстаздары адамгершілік, ар-ұждан, ұят сықылды ұғымдарды үйретіп, тәрбиелеумен қоймай, білікті әрі білімді маман болып қалыптасуға баулиды.

Қазақстанның теңіз астанасы аталатын Ақтау қаласының төрінде «Каспий Өңірі «Болашақ» ЖШС колледжі орналасқан. Елдегі ең мықты және сапалы әрі бәсекеге қабілетті колледж рейтингтерінің 12-ші орнын иемденген колледжіміздің қабырғасында 1204000 «Су көлігін пайдалану» мамандығы бойынша ЭВТ- 18 және ЭВТ-17 топтарының шәкірттері тәлім алуда.

Оқу жылының жоспарына сәйкес студенттер кәсіптік тәжірибелерін мамыр айы бойы ҰК «Ақтау Теңіз Халықаралық Сауда Порты» АҚ және «БатысМұнайТранс» ЖШС өтуі тиіс болатын, бірақ жер жүзін жаулаған індет салдарынан елімізде төтенше жағдай жарияланып, студенттер қашықтықтан оқуға көшті. Шәкірттеріміз теориялық пәндерді тәмәмдаған соң, кезек қашықтан тәжірибе өткізуге келді.

You tube арнасындағы «Наука 2.0» және «Discovery» каналдары ұсынған алып кемелер туралы және арнайы су көлігі туралы қызықты да танымды бейнежазбаларды тамашалау арқылы шәкірттеріміз ілімдерін одан әрі шыңдай түсті. Бұдан бөлек «European ship simulator» симуляторы арқылы буксир, танкер, лайнер, контейнер тасушы және т.б. кемелерді жүргізіп, әртүрлі іс-қимылдарды орындады. Кемелерді айлаққа швартовтау, үлкен кемелерді портта буксирлеу, портқа қауіпсіз кіріп шығу, берілген курс бойынша кемені жүргізу сынды тапсырмаларды орындады.

Әрине, кемеге мініп, қолғап пен каска киіп, капитанның тапсырмаларын орындау студенттеріміздің маман болып қалыптасуына тигізер әсері зор екені даусыз, алайда орын алған жағдайға орай қашықтан өткен тәжірибенің студенттерге берген пайдасы үлкен екенін нық сеніммен айта аламын.

Битеуов Р. С.

«Каспий өңірі «Болашақ»

колледжі ЖШС

оқу-өндірістік шебері