Ұлттық дастархан балабақшаға арналған ойын сценарийі

Сценарий тақырыбы: «Ұлттық дастархан»

Сценарий мақсаты: Балаларға ұлттық тағамдар туралы түсінік беру арқылы қазақ халқының салт-дәстүрін көрсету және оны құрметтей білуге тәрбиелеу.

Жүргізуші: Қайырлы күн, құрметті әріптестер, балалар! Жер жүзіндегі халықтардың бәрінің де түрлі мейрамдары бар. Шығыс халықтарының сондай ерекше мейрамдарының бірі – Наурыз. Дәстүрімізге айналған Ұлыстың Ұлы күні – Наурыз құтты болсын! Күлімдеген шуақты көктеммен бірге қазақ даласына жер әлемді жайнатып, әнші құстарды сайратып, Наурыз тойын тойлатып Жаңа Жыл келеді. Ендеше, той құтты болсын! Ұлыс оң болсын! Ақ мол болсын! Ұлы мереке сіздерге тек жақсылық әкелсін!

Наурыз келді, жайраң қақты таң күліп,

Жап-жасыл болып кетті дүние жаңғырып.

Жақсылыққа жаршы болған Наурызым!

Сен өмірдің көктемісің мәңгілік!

Жүргізуші: Наурыз – ел мен елді, ұлыс пен ұлысты біріктіріп қана қоймайды. Осы кезден бастап мал төлдейді. Ұзақ суық қыстан кейін жаңа тіршілік басталады. Ұлыстың ұлы күні күн мен түн теңеледі. Осы бір құбылыстың өзі оның сипатын аша түскендей.

Қыс өтіп, қар кетіп,

Шырайлы шуақ көктем жетіп,

Шаруаның бұл кеңелген

Күн мейрамы ежелден.

Құтты болсын, бұл Наурыз!

Жүргізуші: Наурыз ұлттық мереке болғандықтан, қазақтың ұлттық тағамдары туралы айтпасқа болмайды. Қазақтың дәстүрлі дастарқаны негізінен мал шаруашылығының өнімдері – ет, сүт тағамдарынан құралады.

«Ағы бардың – бағы бар» деп халқымыз сүт тағамдарын ерекше қастерлеп, құт-береке, несібе деп киелі санаған. Ал егіншілік өнімдері – астық, көкөніс, жеміс-жидектер ұлттық тағамдарға қосалқы нәр беруші, дәмдегіш ретінде саналған.Ұлттық тағамдардың көпшілігін біз төрт түлік малдан аламыз. Осы тағамдар туралы балалардың тақпақтарын қабыл алыңыздар.

Үш кесе ішем күніге,

Мен қымызды сүйемін.

Ашытылған күбіде,

Ол сүті ғой биенің. Мирас

Бір шөкім тұз үйіне ала барған,

Адамды да қарсы алады алдан.

Сосын: «Наннан ауыз ти!» - деп тұратын,

Айналайын ардақты аналардан. Амина

Майлы етті турап алдым,

Пісіріп оны ел жер кілең

Жасалды тек шұжық бұл,

Жылқының ғана етінен. Е.Айлин

Ата-бабаң азығы,

Атаңа бер қазыны.

Қасық батбас қатық бар,

Көппен бірге татып қал. Ясмин

Қырда жүрсек күнұзын,

Сіміріп қазақ қымызын.

Сары май, ірімшік, құртпен –

Жентің сол әжең жегізген. Айзере

Қаймақ, қатық, қуырдақ,

Қымыз, қазы, құрт – майы.

Шалап, шұжық, шытырлақ,

Шелпек, бауырсақ, ірімшік,

Ет пен наурыз көжесі,

Не керектің бәрі бар. Рамазан

Тамақтар дап-дайын,

Таңдайсыз қандайын?

Тағамның не түрін,

Тағы да қамдайын.

Келіңіз, келіңіз,

Сый-сыяпат көріңіз. Көркем

Дастарханда дәніміз,

Жайдарымыз бәріміз.

Көжесі көп, қыры көк,

Қандай жақсы наурыз. Дарын

Әже:Ұлыстың ұлы күні кем дегенде жеті түрлі дәмнен тұратын Наурыз көже дайындалады. Наурыз көжеге соғымнан қалған сүр ет, қатық, сүт, бидай, тұз, су қосылады.