Үштұғырлы тіл тақырыбындағы эссе

«Үштұғырлы тіл – кәсіби жетістіктің белгісі»

«Тіл» дегеніміз не? Ол қандай қызмет атқарады? Тіл – ең алдымен қарым – қатынас құралы. Адамзат баласы бір – біріне деген сенім мен сезімін, қуанышы мен күйінішін тіл арқылы жеткізеді. Тіл – қандай да бір ұлтта, елде ең қастерлі де құдыретті ұғым. Тіл – адамзат баласына ана сүтімен дарып, қалыптасады. Әрбір елдің ұлттық мақтанышы, баға жетпес асыл мұрасы.

«Өзге тілдің бәрін біл, өз тіліңді құрметте» деп Қадыр Мырзалиев атамыз керемет айтып кеткен. Басқа тілді біле отырып, өзінің ана тілін жоғары қойып, құрметтеп, мақтаныш ететін жан – өз елінің патриоты, жан дүниесі рухани бай адам. Ана тіліміздің шұбарланып кетпеуіне, оны көзінің қарашығындай қорғауға әрбір қазақ баласы міндетті, жауапты. Өйткені «қазақ тілі» деген ұғым бізге жайдан – жай, оңай келген жоқ. Қаншама ата – бабаларымыздың қаны мен жаны арқылы келген қасиетті ұғым. Тәуелсіз ел болып, ана тіліміз болса деген асыл армандары. Тілдің құдыреті мен қасиеті тереңде жатқаны бәрімізге мәлім. Сондықтан, ол – біздің ең басты байлығымыз болуы тиіс.

Елбасы Н. Ә. Назарбаев қазіргі таңда үш тілді білуді міндеттеп отыр. Оның үлкен мәселе болатыны анық. Неге? Себебі, бұл мәңгүрттену жолына әкеледі деген ой – пікірлер өте көп. Жоқ. Менің ойымша, өзге тілдерді білу арқылы біз рухани бай боламыз. Еркін сөйлей алып, жаза алатын деңгейге жетсек, бәсекеге қабілетті елге айналамыз. Көзіміз ашылып, көкжиегіміз кеңейіп, өрісіміз ұлғая түседі.

«Үштұғырлы тіл» идеясы – жаңа бастама, өмірлік қажеттіліктен туындаған идея. Қытай тілінен кейін халық саны бойынша ең көп пайдаланатын тіл – ағылшын тілі. XXI ғасырдың әлем мойындаған жаһандану тілі. Енді ойлаңыз Қазақстан мемлекеті әлемдік аренаға шығу үшін өз ана тілімізбен қоса, қай тілді жетік меңгеруі керек? Біз өзге тілді білу жолында ұтылмаймыз, қайта ұтамыз. «Мәңгілік елге» айналу жолында айқара ашылған есік болмақ.