Ұстаз – ұлы есім тақырыбындағы эссе және шығарма

Ұстаз деген - ұлы есім.

«Тамшысымен тас тесетін бейнебір су тәрізді жандар...» осы жолдарды әл-Фараби бабамыздың еңбектерінің ішінен көзім шалып қалып қайран қалған едім бір кезде, кім туралы екенін білесіз бе ...? Ұлы бабамыз- мұғалім,ұстаз туралы жазған екен. Не деген керемет теңеу!

Шынымен де бұл дүниедегі мамандық атаулының бәрінің анасы әрі төресі ұстаз екені даусыз.Өйткені ол барлық мамандық иесін тәрбиелеп,оқытып үйрететін алғашқы баспалдақ. Кім болса да мейлі ол ұлы ғалым,мықты дәрігер,жер игерген диқан,төрт түлікпен айналысқан фермер болсын, ол ең бірінші мектеп табалдырығымен, ұстаздың алдынан өтеді.

Мектепсіз мұғалім,мұғалімсіз шәкірт болмайды. Бұл жөнінде Ұлы ұстазымыз Ахмет Байтұрсынұлы бір –ақ ауыз сөзбен «Мұғалім мектептің –жаны» деп нақты бағасын берген. Демек, ұстаз болмаса мектеп те ,білім де болмайды екен.

Қай заманда да ұстаздарға деген құрмет бәрінен де биік және жоғары болған. Тарихта ақыл-парасаты мол тұлғалардың көпшілігі ұстазына ерекше құрметпен қарап,әрдайым ізетпен құрметпен еске алғандары мәлім.

Мәселен,Ескендір Зұлқарнайын-Аристотельді,Абылайхан –Төле биді, Шәкәрім –Абайды, Жамбыл-Сүйімбайды өздерінің ақылшысы әрі ұстазым деп санап ,оларды әрқашанда пір тұтқандығын жазған.

Солардың бірі Ескендір Зұлқарнайын: «Мен ұстазыма әкемнен кем қарыздар емеспін. Әкемнен өмірді алсам, Ұстазымнан сол өмірге керектінің бәрін алдым» деп құрметпен еске алған екен. Ал Абай атамыз «Адамның адамшылығы- жақсы ұстаздан болады» деп тоқ етерін бірақ айтқан .

Шындығында,әр балаға ұстазының берген тәрбиесі мен білімі,берген өнегесі оның болмысына әсер етіп,өміріне,болашағына таусылмастай азық болатыны даусыз.

Жақсы ұстазға кезігіп нақты ,жемісті білім алған бала - өмір майданында тайсалмай,еркін жүзіп, жолында кездескен қиындықтармен еш мойымай күресіп, алған бағытынан таймасы анық.

Жеткен жетістіктерімен алар асуларындағы табандылығымен қатар, өзіне не керегін жақсы түсінетін оқушылардың бәрі әрқашан да ұстазының айтқандарымен көрсеткен жолдарын ,берген бағытын,өздерінің қиналған кездерінде үнемі еске алып отырғандарын ешқашан жасырмаған және кейін осы мәселені толық меңгеруіндегі ұстазының өзіне сіңірген ерен еңбегін әрқашан ашық мойындап айтып отырған.