Жарқын елдің шамшырағы жас маман аттестаттау материалы

«Жарқын елдің шамшырағы – жас маман»

Ұстаз,ұстаз!!! Осы сөзде жатыр қанша ұлылық, Осы сөзде таусылмайтын жылылық. Әл Фараби, Ыбырай мен, Ақаңды Осы сөз ғой, қойған бізге ұлығып. Ұстаз шебер қисықтарды жөндейтін, Тентектерді ақылменен емдейтін, Болса дағы малға кедей өмірде. Бар байлығым шәкірттерім сен дейтін!- өлең жолдарын оқығанда, мен өзімді бақытты сезінемін. Ұстаз болғаныма мақтанамын. Өйткені ұстаз – мақтан тұтар мамандық.

Мен, жоғары білімді, шет тілі пәнінің мұғалімі Төрединова Шолпан Жанәділқызымын. Еңбек жолымды 2015 жылдан бастап тарихы терең Арал ауданының, №68 орта мектебінен бастадым.Қазақ сыныптарына шет тілі пәнінен сабақ беремін. Аты аталған мектепте ұстаздық қызмет етіп жатқаныма биыл 4 жыл болады. Ең алғашында жаңа ортаға тез қалыптасып үйренісу, ұжымға жылдам сіңісіп кету өте қиынға соқты. Әйтсе де алға қойған мақсатымнан танбадым. Менің мақсатым- қазақ балаларына шет тілді ғана үйрету емес, шет елдердің салты мен дәстүрін, жомарттығы мен парасатын ұғындыру, әр шәкірттің бойына , ниетіне ізгілік пен мейірім шапағатын себу. Шет тілінің маңызын, қазақ балаларына сездіріп, тілге деген қызығушылығын арттыру болды.

Жас маман – ешнәрсені назарынан тыс қалдырмайтын, жадында тек жақсы істерді сақтайтын, ізденімпаз, қорқыныш пен жасқануды білмейтін батыл тұлға дер едім.Әр сабақты түсіндірген сайын бойымды қорқыныш сезімі билейтін. Бірақ та ештеңеге қарамастан болашаққа нық сеніммен ұстаздық қызмет жолымды бастап та кеттім. Егер мұғалім өн бойына, өз ісіне, шәкіртіне деген сүйіспеншілікті жинақтаса, ол “нағыз ұстаз” деген орыс жазушысы Лев Толстойдың нақыл сөзін жадымда ұстаймын.

Мектеп – балаларды бүлдіршін кезінен бастап, есейіп ер жеткенге дейін білім нәрімен сусындатар алтын ордамыз. Мектеп табалдырығына алғаш қадам басқан соң, жылы шыраймен қарсы алатын, анаңдай тәрбиелейтін ұстазды көресің.Қазақтың: «Мектеп –кеме, білім- теңіз» сынды мақалы бекер айтылмаса керек. Себебі сенің «МЕКТЕП» атты кемең қай жерге дейін сені жетелесе, сен де сол жерге дейін барып биік шындардан көрінерін анық. Мұғалімнен өнеге-білім алып, өмір теңізіне құлаш ұрған кез келген шəкірт ұстазымен мақтанады. Ұстаз - мектептің жүрегі, бала жанының бағбаны

Бүгінгі ұстаз шәкіртіне ғылым негіздерінен мәлімет беріп қана қоймай, оны дүниежүзілік білім, ақпарат, экономика кеңістігіне шығуға, яғни қатаң бәсеке жағдайында өмір сүруге тәрбиелеуі керек. Ол нағыз ұстаздың ғана қолынан келеді. Енді, сәтін салса Мағжан ақын айтқандай, Алты Алаштың баласы бас қосса, төр – мұғалімдікі болатын күн туады .

«Білімнен асқан байлық, қараңғылықтан асқан қасірет жоқ» деген көнеден келе жатқан нақыл сөз бар. Бүгінгі заманда жеке тұлғаның да, мемлекеттің де тағдыры тек білімге тәуелді. Соған орай, менің мақсатым - сапалы білімді шәкірт жүрегіне ұялату, меңгерту.

Заман күннен- күнге дамып, өркендеу үстінде. Бүгінгі таңда жаңашылдыққа толы XXI ғасыр талабына сай лайықты, шығармашылыққа жаны құмар, дарынды, сауатты да саналы жеке тұлға қалыптастыру және тәрбиелеп шығару біздің міндетіміз.

Елбасымыз Нұрсұлтан Назарбаев: «Болашақта еңбек етіп, өмір сүретіндер – бүгінгі мектеп оқушылары, мұғалім оларды қалай тəрбиелесе, Қазақстан сол деңгейде болады. Сондықтан, ұстазға жүктелетін жүк ауыр» деген болатын. Қазіргі заман мұғалімінен тек өз пəнінің терең білгірі болу емес, педагогикалық-психологиялық сауаттылық, жан-жақты тарихи таным, саяси экономикалық білімділік жəне ақпараттық сауаттылық талап етуде.

ХХІ ғасырдың нағыз ұстазы: ол өз кәсібінің майталманы, осы мақсатқа рухани күш-жігерін, парасат-қуатын салу керектігі айтпаса да түсінікті. Бұл – әркімнің қолынан келе бермейтін, ерекше талантты қажет ететін, бай қиялды адамға тән қасиет.

Сондай-ақ ұстаз күнбе күнгі өзінің көп қырлы еңбегінде мазмұны әр түрлі кездейсоқ жайттардың туындап отыратынын алдын ала сезіп, болжап және оның оң шешімін табуға дайын болуға тиіс.Сондықтан да ұстазды әр баланың жан-дүниесін танып-білуші әрі оны жеке тұлға етіп қалыптастырушы, ел болашағының мүсіншісі деуге болады. Ұлы ағылшын ағартушысы Уильям Уорд:

Жай мұғалім хабарлайды,

Жақсы мұғалім түсіндіреді,

Керемет мұғалім көрсетеді,

Ұлы мұғалім шабыттандырады,- дейді. Білім беру жүйесі мамандардан кәсіби икемділік пен ұтқырлықты, сан қырлы шығармашылық қызмет пен өзін-өзі басқару, өзін-өзі ұйымдастыру жағдайындағы біліктілікті қажет етеді. Өйткені қазіргі жас буын-еліміздің келер күнгі келбеті.