Жас экологтар мектепке дейінгі балаларға арналған ашық сабақ

Білім беру саласы: Әлеуметтік орта

Тақырыбы: Жас экологтар

Мақсаты: Білімділік:.Проблемалық жағдайларды шешуді үйрету. Тірі организмнің қоршаған ортамен байланысы туралы түсініктерін нығайту. Сөздік қорларына «эколог», «экологиялық апат» сөздерін енгізу.

Дамытушылық:.Қыстап қалатын және жыл құстары туралы түсініктерін нығайту. Қоршаған орта, оны қорғау туралы білімдерін дамыту.

Тәрбиелік:Табиғатты қорғауға деген қызығушылыққа тәрбиелеу. Бір-бірін тыңдай білуге, бір-бірінің пікірін құрметтеуге үйрету.

Ресурстар: (материалдар, жабдықтар): жоспар - сызба, қыстап қалатын және жыл құстарының суреті, көк түсті мата (өзен), қорап, сым, қайшы, жұмыс дәптері.

Сөздік жұмыс: эколог.

ҰОҚ барысы:

І кезең: ұйымдастырушылық-қозғаушылық.

Қуанамын мен де,

Қуанасың сен де.

Қуанайық достар,

Арайлап атқан күнге.

ІІ кезең: ұйымдастырушылық-ізденістік. Жоспар- сызба бар хатқалтадағы Тиіннің хатын ашып оқу: «Құрметті, балалар! Мен сендерді саяхатқа шығуға шақырамын. Бізге қайда журу керектігін жоспар-сызба көрсетеді. Сендерді алда қызықты кездесулер мен шешілмеген мәселелер күтіп тұр».

-Балалар «Өзен», «Орман» , « Зертхана» , «Шеберхана», аялдамаларына

саяхат жасаймыз.

1-аялдама. «Өзен» аялдамасы: Балалардың алдынан Тиін шығып: «Бір бала мені орманда көріп, ақырын келіп, ұстап алды. Мені осында әкеліп тастап кетті. Жан - жағыма қарасам, маған таныс емес жер. Мұнда су, жер, мен білмейтін өсімдіктер. Менің өз үйіме қайтқым келеді. Бірақ менің айналамдағылардың не нәрсе екенін білгім келеді. Маған сендер айтып беретін шығарсыңдар».

- Балалар, өзенде нелер өмір сүреді?

- Өзенде балықтар, шаяндар, жәндіктер, өсімдіктер өседі. Жануарлар өзенге су ішіуге келеді.

- Өзенді мекендейтіндер табиғаттың жанды, жансыз денелерінің қайсысына жатады? Тиінге дәлелдеп беріңдерші.

- Олар жанды денелерге жатады. Өйткені олар көбейеді, өседі, қозғалады, тыныс алады, қоректенеді, өледі.

Еденде төселіп дайындалған өзен (онда қоқыстар көп).

- Не көріп тұрсыңдар? Не істеуіміз керек?

Балалар өзенді қоқыстардан тазарту керектігін айтып, қолдарына қолғап киіп, қоқыстарды жинайды.

-Жарайсыңдар, балалар! Сендер өзенді қоқыстан тазарттыңдар. Табиғаттың таза болуына көмектесетін адамды кім дейтінін білесіңдер ме? Табиғаттын тазалығын бақылайтын адамдарды экологтар дейді. Сендер бүгін жас экологтар болдыңдар. Мен сендерге арнайы экологтар галстугын тапсырамын. Неге оның түсі жасыл деп ойлайсыңдар?

- Экологтар табиғатты қорғайды, сондықтан галстук жасыл түсті болады.

Судың сылдыраған дыбысы естіледі (аудиожазба).