16 жас және өмір бастауы туралы тәрбиелік мақала

16 жас өмірдің бастауы еді…

Қазақстанда соңғы кездері түрлі қылмыстар мен ауыр оқиғалар жиілеп барады. Бірақ кейбір жағдайлар ел жадында өшпестей із қалдырып, бүкіл қоғамды дүр сілкіндіреді. Сондай қасіретті оқиғалардың бірі – небәрі 16 жасында өмірі қиылған Шерзаттың өлімі.

Бұл – тек бір жанұяның емес, күллі елдің жүрегіне жара салған жағдай. Қайғылы оқиға Алматы облысы, Талғар ауданында орын алған. Әкесінің дүкені жанында туған дау бірнеше минут ішінде қатыгез қылмысқа ұласқан. Куәгерлердің айтуынша, бір топ адам Шерзатқа жабылып, оны аяусыз соққыға жығып, пышақтап кеткен. Ең ауыр тұсы – бұл оқиға анасы, әкесі, ағасы мен әжесінің көз алдында болған.

Шерзаттың өлімі туралы хабар тараған сәттен бастап әлеуметтік желілерде халықтың ашуы мен қайғысы қатар өрбіді. Әлеуметтік желілерде бұл істің әділ қаралуын талап еткен үндеулер, жазбалар күн сайын көбейіп жатыр. Көпшілік бұл оқиғаны жай ғана жанжал емес, алдын ала ұйымдастырылған қатыгездік деп бағалайды.

Сот процесі әлі жалғасуда. Күдіктілер ұсталғанымен,әділ үкім әлі шықпады. Қоғамда күдік пен алаң бар – “шын мәнінде әділет салтанат құра ма?” деген сауал талайдың көкейінде. Себебі мұндай істердің кейде аяқсыз қалатынын көріп жүрміз.

Бұл оқиға – статистика үшін бір дерек емес. Бұл – балалық пен болашаққа балта шабылған сәт. Шерзаттың 16 жасы – өмірдің енді басталған шағы еді. Армандары мен мақсаттары, үміттері бар еді. Бірақ бәрі бір сәтте үзілді. Мұндай жағдайлар қайталанбас үшін, үнсіз қалмау – бәріміздің борышымыз.

P.S. Бұл бір отбасының ғана емес,тұтас қоғамның сын сәті.. Әділет салтанат құрсын десек, бейжайлыққа жол жоқ.

Авторы:Боранбаева Айшабибі