Абыройы асқақ азамат туралы мектепке арналған мақала

Абыройы асқақ азамат

«Адамның адамгершілігі жақсы ұстаздан болады»,- деп ұлы Абай атамыз айтқандай, бар саналы ғұмырын білім саласына арнап, тынымсыз адал еңбектің үлгісін көрсетіп келе жатқан 35 жыл еңбек өтілі бар, жоғары санатты дене тәрбиесі пәнінің мұғалімі Жалаков Мұхтар Кумшековичтің өнегелі өмірі жайында ой өрбіткенді жөн санадым. Мұхтар Кумшекович қазанның аяғында асқаралы 60 жасқа толып отыр. 1976 жылы мектепті аяқтап, Қарағанды Педагогика және Денешынықтыру Институтына (КПИФВ) түсіп, 1980 жылы ойдағыдай аяқтап, жолдамамен Екібастұз қаласында № 6 мектепте алғашқы еңбек жолын бастаған. Бокстан бапкер болып, кейін № 6 мектепте денешынықтыру пәнінен мұғалім болып дәріс берген. Осы жерден Отан алдындағы міндетін атқару үшін Кеңес Одағы әскері қатарына шақырылған. Әскер қатарынан аман-есен оралып, Қарағанды қаласында «Қайрат» Жастар спорт ошағында спорт инструкторы болып еңбек еткен. Кейін № 12 мектепте 7 жыл еңбектеніп, ұстаздық жолын жалғастырған. Жеңіл атлетикадан, волейбол, гандбол ойын түрлерінің қыр- сырларын өзінің шәкірттеріне аянбай үйреткен. Соның дәлелі: 1988 жылы Республика көлемінде өткізілген жеңіл атлетикадан «Старты надежд» жарысында оқушылары жүлделі 1- орынды иеленген. Жұмыс бабы

Абыройлы міндетті ақаусыз атқарған мұғалімді халқымыз қашанда ерекше құрмет тұтқан. Алғашқы еңбек жолын бастаған Екібастұз қаласындағы 7 спорт сыныбында оқытқан оқушысы Кременши Николай сынды оқушысы 1988 жылы Ауған жерінде ерекше ерлік көрсетіп, командирін ажал оғынан құтқарғаны үшін Кеңес Одағының Батыры атағын иеленген. Қазіргі уақытта Мұхтар ағадан тәлім- тәрбие алған оқушысы Николай Алматы қаласында тұрады.

«Шәкіртсіз ұстаз – тұл» демекші, ең мақтанарлығы, төрткүл дүниені таңқалдырып, шартарапқа даңқы шыққан әйгілі боксшы Геннадий Головкинге де Мұхтар аға білім нәрін сеуіп, дене тәрбиесінен сабақ берген. Мұхтар аға Геннадийдің бүгінгі күнге жеткен жетістіктеріне марқайып, ерекше сезіммен есіне алды: «Гена спорттық жарыстарда көшбасшы болып, өзінің табандылығымен ерекшеленді. Қандай спорттық жарыстар болса, сол жарыста Гена бой көрсететін. Өте тәртіпті, алғыр бала болды. Осындай оқушыға сабақ бергеніме өте қуаныштымын».