Адамның жан сұлулығы 5 сынып ашық сабақ үлгісі

Өзiн-өзi тану сабағының жоспары

Мектеп: №8 гимназиясы КММ

Мерзімі: 29.09.2016ж

Сынып: 5а

Оқушылар саны: 25

Сабақ №4

Тақырып: Адамның жан сұлулығы

Құндылық: Дұрыс әрекет

Қасиеттер: әділдік, қайырымдылық, жауапкершілік

Мұғалiм: Кулмурзаева Нурсулу Оразбаевна

Сабақтың мақсаты: Оқушыларға адам жанының сұлулығы туралы түсінік бере отырып, дұрыс әрекет құндылығының мәнін ашу.

Міндеттері:

а) Білімділік. Жан сұлулығы ұғымы туралы түсінік беру;

ә)Дамытушылық. Оқушылардың бойында жан сұлулығы болып табылатын қайырымдылық, әділдік, жауапкершілік қасиеттерін дамыту;

б)Тәрбиелік. Адамды жан сұлулығына жеткізетін ізгі істерге, сенімділікке, әдептілікке, қайырымдылыққа тәрбиелеу.

Ресурстар: интерактивті тақта, слайдтар, үнтаспа, оқулық, жұмыс дәптер

Сабақ барысы:

Ұйымдастыру кезеңi. 5 «Т» ережесін сақтау керектігін еске түсіріп қайталау. (Тәртіп,Талап,Тазалық,Тыныштық,Татулық)

Тыныштық сәтi. «Нұрға бөлену»

Ыңғайланып отырыңыздар, денелеріңізді түзу ұстаңыздар. Аяқ-қолыңызды айқастырмаңыз. Қолыңызды тізеңізге немесе үстелге қоюға болады. Көздеріңізді жұмуларыңызды өтінемін.

Елестетіп көріңіз: Күн нұры сіздің төбеңізден өтіп, кеудеңізге қарай бойлап барады. Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді. Балғын және таза әсем гүл сіздің әр ойыңызды, әр сезіміңізді, эмоцияңыз бен тілек-қалауыңызды шайып, жүрегіңіздің қауызын ашты.

Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Оймен осы нұрды қолдарыңызға түсіріңіз. Сіздің қолдарыңыз нұрға бөленіп, сәуле шашуда. Қолымыз тек жақсы, ізгі істер істейді және баршаға көмектеседі. Нұр аяқтарыңызға тарады. Аяқтарыңыз нұр сәулесін шашуда. Олар сізді тек жақсылық жасау үшін жақсы жерлерге апарады. Олар нұр мен махаббат құралына айналды.

Одан әрі нұр сіздің аузыңызға, тіліңізге тарады. Тіліңіз тек шындықты және жақсы, ізгі сөздер ғана айтады. Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді. Нұр көздерімізге де жетті, көзіміз тек жақсыға қарап, бәрінен жақсылықты ғана көреді. Сіздің басыңыз түгелдей нұрға бөленіп, басыңызға тек ізгі, сәулелі ой келеді.

Нұр бірте-бірте қарқын және шұғылана бастайды, сіздің денеңізден шығып, жан-жағыңызға сәуле шашады. Осы нұрды туысқандарыңызға, мұғалімдеріңізге, достарыңызға, таныстарыңызға бағыттаңыз. Нұрды уақытша түсініспей, ренжісіп жүрген адамдарға да бағыттаңыз, олардың да жүрегі нұрға толсын.

Осы нұр бүкіл әлемге: барлық адамдарға, жан-жануарларға, өсімдіктерге, барлық тірі жанға таралсын... Ғаламның барлық түпкір-түпкіріне нұр бағыттаңыз.Ойша айтыңыз: «Мен нұрлымын... Нұр менің ішімде... Мен Нұрмын». Осындай Нұр, Махаббат және Тыныштық күйінде отыра тұрыңыз!...

Енді осы Нұрды жүрегіңізге орналастырыңыз. Нұрға толы бүкіл әлем сіздің жүрегіңізде. Оны осындай әсем қалыпта сақтаңыз. Жаймен көзіңізді ашуға болады. Рахмет.

Оқушылар өз әсерлерімен бөліседі.

Сұрақтар:

1. Қандай күйде болдыңыздар?

2. Жаттығу қалай әсер етті?

Ой қорыту:

- Олай болса, оқушылар, дұрыс әрекетті пайдалана отырып, ішкі тыныштық күйімізді сақтап қалайық.

Үй тапсырмасын тексеру.

Оқулықтың 17-бетіндегі 4-сабақта берілген А.Л.Бжиска «Сұлулық сыры» әңгімесін оқып келу берілген.

Мәтін бойынша сұрақтар:

1.Әңгіме не жайында айтылған?

2.Бейбітті қандай ой толғандырды?

3.Бейбіт Мақсұт ағайының берген ақылынан қандай ой түйді?

4.Адамды тек сыртқы келбетіне байланысты сұлу деп айта аламыз ба? Неге?

5.Балалар адам сұлулығын қандай құндылықтарынан байқауға болады?

6.Оқиғада кімді айтар едіңіз дұрыс әрекет жасаған деп?

7. Өз өмірлеріңде осыған ұқсақ жағдайлар болды ма?

Ой қорыту

Ендеше, балалар , әрқашан ақиқатты шындықты жақтап, сүйіспеншілікпен дұрыс әрекет жасайтын болсақ өмірде әрқашан жолымыз ашық болады.

Сабақ барысын талқылау:

Дәйексөз.

«Сыртқы сұлулық толық болуы үшін, ішкі сұлулықпен жандану керек»

Виктор Гюго

Мұғалімнің түсіндіруі:

Қоғамда жүрек жылуын,шапағат нұрын төге білетін адамның ішкі және сыртқы сұлулығы нәзіктік, сезімталдық, мейірімділікке байланысты болады. Әр адамның өзіндік сұлулығы бар. Бірақ ол сырткелбеті емес,жан сұлулығына байланысты.

Дәйек сөзді талдау.

Мұғалімнің сұрақтары:

1.Сыртқы сұлулықты қалай түсінесіңдер?

2.Осы дәйексөзді қандай ой түйіндеуге болады?