Әдептілік пен әдемілік туралы 2 сыныпқа арналған тәрбие сағаты

Тақырыбы: «Әдептілік – әдемілік »

Мақсаты: Оқушыларды адамгершілікке, әдептілікке, қарапайымдылыққа, кішіпейілділікке, әдептілікке, жаман әдеттерден аулақ болуға тәрбиелеу.

Әдіс-тәсілдері: Сұрақ-жауап, пікіралмасу, ой қозғау, топтық жұмыс

Көрнекілігі: Өсиет сөздер, мақалдар, адамгершілікке байланысты суреттер/слайдтар/

Барысы:

І. Кіріспе бөлім

Шаттық шеңбері: Сәлемдесу1. Ассалаумағалейкум!- Уағалейкумассалам.2. Сәлем бердік!- Амансың ба?3. Сәлем!- Сәлем.4. Кеш жарық!- Жап – жарық,5. Қайырлы таң!Күнің жарық болсын!- Өзіңе де соны тілеймін.6. Армысыз әже!- Амансың ба, құлыным!7. Армысыз ата!- Есенсің бе, жарқыным.8. Сәлеметсіз бе!- Сәлеметсің бе!

Ұл- қыз сәлем береміз,

Өнегелі өренбіз.

ІІ.Негізгі бөлім

-Балалар, бүгін біз «Әдептілік-әдемілік»тақырыбында әңгіме қозғаймыз. Қазақ халқы ерте кезден – ақ әдептілікті жоғары бағалай білген. Отбасында балаларды кішіпейілділікке, ізеттілікке,имандылыққа, инабаттылыққа тәрбиелеуді мақсат етіп қойған. Халқымыз :

-«Әдептілік, ар – ұят Адамдықтың белгісі Тұрпайы мінез тағы жат – Надандықтың белгісі»,-деп баласын әдепті болуға тәрбиелеген. Ендеше, біз бүгінгі тәрбие сағатымызда өзіміздің қаншалықты әдепті екенімізді байқап көрелік.

1.Пікіралмасу

- Әдептілік дегенді қалай түсінесіз? Сол жөнінде оқушылар пікірін тыңдайық.

1 - оқушы:

Әдептілік - әдемілік. Әдепті адам әдемі.Ол өзінің дұрыс киінуі, сыпайы сәлемдесуі, өзін-өзі күте білуімен әдемі.

2 – оқушы:

Мен Жансаяның пікіріне қарсымын. Әдемі адамның бәрі әдепті бола ма?

Әдептілік дегеніміз өзін-өзі кез-келген ортада ұстай білу. Ол әдемі болмаса да, өзін-өзі ұстай білсе - әдепті.

3 – оқушы:

Үлкен кісілерге «Ассалаумағалейкум» деп амандасып, амандығын, денсаулығын сұрау парыз. Дұрыс амандасудың адамгершілік, имандылық мәні бар. Иманы жоқтың, ұлты жоқ.

4 – оқушы:

Неге? «Ассалаумағалейкум» деп амандаспасан, үлкендер сәлемімізді алмай ма? Әйтеуір үндемей кетпесек болды емес пе?

5 – оқушы:

Дұрыс тамақтану, мезгілді ұйықтау, ата мен ананы сыйлау - халықтың дәстүр, халықтың әдеп. Біз осы нәрселерді, адамгершілік қағидaларды сақтай білсек, ұлттық әдепті қорғай білеміз.

6 – оқушы:

Түнде ұйықтауын ұйықтармын-ау, бірақ теледидардан жақсы кино болып жатса, оны неге көрмеймін. Сонда мен әдепсіз болғаным ба?

7 – оқушы:

Сен дұрыс демалмасаң ерте тұра алмайсын. Әрбір тірліктің өз уақыты бар. Оны дұрыс пайдаланудың өзі әдептілік.