Әйел теңдігі мәселесі туралы мақала 11 сынып

ТЕҢДІК ІЗДЕГЕН ҒАСЫРЛАР ҮНІ

Әйел теңдігі – қоғамның өркениеттілігі мен әділеттілігінің өлшемі. Алайда тарих беттерін парақтасақ, әйел құқығының тапталуы мен шектелуі адамзат мәдениетінің ең үлкен қайшылықтарының бірі болғанын көреміз. Заманауи қоғамда бұл мәселе реттелгендей көрінгенімен, тереңнен зерделесек, шынайы теңдікке әлі де толық қол жеткізілген жоқ.

Кейбір ортада әйел тек отбасының шеңберінде ғана бағаланатын тұлға ретінде қарастырылады. Олардың экономикалық, саяси, мәдени және білім алу мүмкіндіктері шектеледі. Жалақының теңсіздігі, мансап жолындағы кедергілер, тұрмыстық зорлық-зомбылық сияқты мәселелер әлі де өзекті. Бұл жағдайлар әйелдерге тұлға ретінде ғана емес, ұлттың дамуына қосатын үлесін толық ашуға мүмкіндік бермейді.

Әйелдердің білім алуы мен еңбекке араласуы – елдің дамуының негізі. Халықаралық тәжірибелер көрсеткендей, әйелдердің қоғамдағы беленді рөлі экономика мен мәдениетті нығайтады. Әлемнің дамыған елдері әйел құқығын қорғау арқылы саяси тұрақтылық пен экономикалық гүлденуге жеткен.

Қазақ халқының мәдениеті мен тарихында да әйелдің орны ерекше. Домалақ ана, Ұлпан, Айғаным сынды аналардың тағылымы бізге әйелге деген құрметтің маңызын ұғындырады. Бірақ осы дәстүрді сақтай отырып, қазіргі заман талабына сай әйелдердің құқығын қорғауды күшейту – бүгінгі ұрпақтың міндеті.

Әйел теңдігі сақталған қоғамда әділеттілік пен үйлесім салтанат құрады. Әрбір әйелдің еркін таңдау жасап, өзін еркін сезінетін қоғам құру – нағыз қркениеттің белгісі. Бұл тек әйелдердің емес, бүкіл адамзаттың жеңісі болмақ.

Әйел теңсіздігі – өткенімен бірге қазіргі қоғамның да үлкен дерті. Бұл мәселені шешу үшін қоғамның әрбір мүшесі әрекет етуі қажет. Тек сонда ғана шынайы теңдікке қол жеткізе аламыз.

ҚОСЫМША БІЛІМ БЕРУ ОҚУ-ӘДІСТЕМЕЛІК ОРТАЛЫҒЫ

ЖАС ТІЛШІ ҮЙІРМЕСІНІҢ ОҚУШЫСЫ ЖҰМАҒҰЛ ГҮЛСЕЗІМ