Әкенің ұлына өсиеті туралы эссе жазбасы

Көктас ауылының №4 орта мектеп жанындағы

тірек мектебі (Ресурс орталығы) КММ

өзін-өзі тану пән мұғалімі

Ж.А.Аждарова

Эссе

«Әкенің ұлына деген өсиеті»

Шалва Александрович Амонашвили

Өзіндік стилі бар, ұлы педагог, автор Ш. Амонашвили жайлы өз пікірімді жазу үшін оның «Әкенің ұлына деген өсиеті» атты туындысын аса ерекше атап өткім келеді.

Ең алдымен, ата-ана мен әжесінің өз балаларына деген кіршіксіз таза, риясыз ғажайып махаббаты мені ерекше сүйсіндірді. Аталмыш кітапты оқу барысында бала дүниеге келгеннен бастап ұлына деген әке махаббатын сезесің. Бала өмірінің әр кезеңі мен сәтін сипаттай келе, автор баланы тәрбиелеуде тек өз жақындарына ғана емес, сонымен қатар қоршаған ортаға деген өзара сенімділік пен құрмет, мейірімділік пен сүйіспеншілік әдістерін қолдануды ұсынады.

Автордың еңбегін оқи келе, көз алдыңа оның өмірін елестетіп, содан соң еріксіз өз өміріңмен салыстыра келе бала тәрбиесіндегі кейбір маңызды мәселелерді қалдырып отырғанымызды аңғардым.

Нәресте дүниеге келгеннен кейін ересек адамдар да ата-ана, ата, әже ретінде жаңадан өмірге келеді. Олар өз кезегінде бұл жаңа рөлдерінің қаншалықты жауапты және нәрестесі бар отбасы ішіндегі өзара татулық пен сыйластықтың маңыздылығын түсінуі тиіс. Өйткені жаңа туған бала таза ақ қағазды кітап іспеттес, демек келешекте өз перзенті үшін мақтаныш немесе ұят сезімде болатыны ата- анасының берген тәрбиесіне байланысты. Автор сипаттап жатқандай бала өмірінің әр сәті маңызды. Мен бұл ақиқатты тек екінші балам туған кезде ғана түсінгенім, әрине, өкінішті. Дегенмен, тұңғыш балама мейірім мен махаббат аз төгілді деген сөз емес. Жоқ! Тұңғыш баламды тәрбилеу кезінде мен оның тезірек өсіп- жетілуін армандап едім. Ал, қазіргі таңда мен өткен күнге қайта оралып, баламның өсуінде Ш. Амонашвили насихаттап жүрген гумандық тәрбиесінің барлық заңдылықтары мен әдістерін қолданғым келеді. Себебі біздің балалық шақ оралмас кез және өмір де адамға бір- ақ рет беріледі, біз өткенге қайта оралып, қайтадан өз балаларымыздың балалық шағындағы қызықты сәттерін басымыздан екінші рет өткере алмаймыз.