Арман қала Астана туралы эссе жазбасы

Эссе

Арман қала-Астана

«Астана – Отанымыздың жүрегі»

Н.Ә.Назарбаев

Әр тәуелсіз елдің өз астанасы болары хақ. Ал мен туып-өскен, балалық шағымды өткізіп, білім алып жатқан «Қазақстан» деп зор мақтанышпен айта алатын елімнің астанасы-АСТАНА қаласы.

Астана – Тұңғыш Елбасымыз Нұрсұлтан Назарбаевтың өз елі мен халқына,қасиетті қазақ жеріне, өз даласына қондырып, орнықтыра білген өзіндік бір әлемі! Абыройы асып, көк туы желбіреген Астана! Әлемді тамсандырған Астана!Мен Атырау қаласы, жалпы білім беретін №15 Абай атындағы орта мектептің қазақ тілі мен әдебиеті пәні мұғалімі ретінде оқушыларымның «Астана қалай Қазақстанның астанасы болды?» деген сауалға жауабым әрқашан дайын тұрады. Өйткені тарихтың парақталған беттерінсіз, бүгінгіңді,болашағыңды елестету тіптен де мүмкін емес! Тарихқа көз жүгіртсек, Елорданы Алматыдан Ақмолаға ауыстыру туралы шешімді Қазақстан Республикасы Жоғарғы Кеңесі 1994 жылы 6 шілдеде қабылдады, ал Астананың тұсаукесері 1998 жылы 10 маусымда өтті.

Жерұйығын іздеген Асанқайғы бабамыздай тәуелсіз елі үшін ендігі жерұйығын іздеген Нұрсұлтан Назарбаев Есілдің бойына қаланың алғашқы қазығын өзі қағып, бүгінгі асқақтаған Астананы дүниеге әкелгендігі біздің, яғни, қазақ елінің мәңгілік ел бола алатындығын дәлелдеп келе жатыр. Енді келіп, ХХІ ғасырдағы қазақ елін және ата-бабаларымыз үшін ғасырлар бойы арман болған тәуелсіздігімізді бүгінгі Астанасыз елестету мүмкін емес деп ойлаймын. Өз басым,Астана қаласына аяқ басып,бармасам да, оның әсем де, көрікті жерлерін суреттерден көріп, тамсанып отырып,ерекше қызығасың...Мен білетін заманауи салынған ғимараттар көп-ақ.Олардың барлығын бәрі біледі, сөз етеді. Ақорда! Елбасымыздың бүкіл мемлекетпен әртүрлі құжаттарға қол қойысып, жаңа бастамалардың куәгері болып тұр!

«Қазақ елі» монументі-Елбасының «Дүниеде тәуелсіз Қазақ елі бар. Әлемде егемен Қазақстан бар. Оның көп ұлтты, тату, ынтымақшыл халқы бар. Қуатты экономикасы, сенімді саяси жүйесі бар. Ең бастысы – бүгіннен нұрлы, бүгіннен кемел болашағы бар. Сол күнге берік сенім бар!» деген осы бір сөздеріндей болып үн қосып тұрғандай! «Мәңгілік ел» қақпасы! Халқымыздың қасиетті би-шешендері мен ерлері де, «Тайқазаны» сияқты киелі құндылығымызды да тәуелсіз еліміздің тұңғыш Президенті Нұрсұлтан Назарбаев көріктеген. Ал енді «Бәйтерек» бұл барша қазақ жұртын биіктерге шақырып тұрғандай.