Әл-Фараби атындағы ҚазҰУ – зияткер көшбасшылар ордасы

Әл-Фараби атындағы ҚазҰУ – зияткер көшбасшылар ордасы

Әл-Фараби атындағы Қазақ ұлттық университеті - еліміздегі жетекші жоғары оқу орындарының бірі ғана емес, сондай-ақ болашақ көшбасшыларды тәрбиелейтін рухани және интеллектуалдық орта. Университет өзінің ғасырлық тарихында мыңдаған білімді, білікті және қоғамға пайда әкелетін тұлғаларды тәрбиелеп шығарды. Бұл оқу ордасында тек сапалы білім ғана беріліп қоймай, студенттің тұлғалық қасиеттерін дамытуға ерекше көңіл бөлінеді.

Көшбасшылық - қазіргі заманда аса қажет қабілет. ҚазҰУ студенттері тек теориялық біліммен шектелмей, түрлі тәжірибелік алаңдарда өзін-өзі танытып, көш бастап жүруге дағдыланады. Көшбасшылық қасиеттер - сенімділік, шешім қабылдай білу, жауапкершілік, бастама көтеру, ынтымақтастық пен тыңдай білу сияқты бірқатар құндылықтарды қамтиды. Мұндай қасиеттерді қалыптастыруда университетте іске асырылатын психологиялық стратегиялар маңызды рөл атқарады. Арнайы тренингтер, коучингтер, практикалық семинарлар мен симуляциялық ойындар арқылы студенттер шынайы өмір жағдайларына бейімделуді үйренеді.

ҚазҰУ-да білім алатын жастардың бойында ерекше дамытылатын қасиеттердің бірі - эмоционалды интеллект. Бұл ұғым адамның өз эмоцияларын дұрыс тану, оларды басқару, өзгелердің сезімдерін түсіну және оларға жауап беру қабілеттерін біріктіреді. Эмоционалды интеллекті жоғары деңгейде қалыптасқан тұлғалар - өз ортасында сыйлы, шешен, жанжалсыз шешім таба алатын және өзгелерге шабыт бере алатын көшбасшылар. Университет мұндай қабілеттерді дамытуға бағытталған орта ұсынады: пікірсайыс клубтары, волонтерлік қозғалыстар, мәдени шаралар мен жастар ұйымдары - мұның бәрі эмоционалды интеллект пен коммуникативтік қабілеттерді шыңдайды.

Сонымен қатар, Әл-Фараби атындағы ҚазҰУ ұжымы психологиялық ұстанымның маңыздылығына да ерекше мән береді. Бұл - адамның ішкі сенімі, өмірлік мақсатына деген беріктігі, өзгерістерге икемделе білуі және өз құндылықтарына адал болуы. Бұл – тұрақтылық, ерік-жігер, ішкі мотивация және өзіндік сенім жүйесі. Осындай ұстанымдар студентті қиындықтардан қорықпауға, өзін-өзі үнемі дамытуға және қоғамда белсенді болуға итермелейді. Қазіргі білім беру жүйесі тек ақпарат берумен ғана шектелмей, адамның ішкі дүниесін байыту, рухани тұрақтылық қалыптастыру мақсатын да көздейді. ҚазҰУ осы бағытта мақсатты түрде жұмыс істейді. Психологиялық кеңес беру орталықтары, мотивациялық дәрістер, өз-өзіне сенімділік арттыру тренингтері – студенттің ішкі әлеуетін ашуға көмектеседі.