Алтын сақа ойыны мен сценарийі мектепке дейінгі топқа

22 Наурыз ертеңгілігі

Тақырыбы: «Алтын сақа»

(музыка әуеніне жүргізуші кіреді)

Жүргізуші: Армысыздар құрметті қонақтар. Ұлыс күндеріңіз құтты болсын! Келе жатыр жылымыз, Мейрамдаймыз мұны біз. Халқы сүйген мейрамды, Қарсы алайық Наурызды!

(музыка әуеніне Әже мен Наурыз қыз ортаға келеді, әже шашу шашады)

Наурыз қыз: Наурыз тойы – береке, Наурыз тойы – жыр аңыз. Қызып дулы мереке, Қызық думан құрамыз.

Жүргізуші: Балалар, бүгінгі мерекемізге бізге «Алтын сақа» ертегісі қонаққа келіп отыр. Ертегіні тамашалайық!

(Ата қолында қамшысы бар, қой жайып жүреді)

Ата: Шек, шеку, ей кебенек! Мына ешкілер әбден мазамды алды. «Қой бақтым, қоңырау тақтым, ешкі бақтым, еңіреп бақтым» деген осы екен ғой. Уһ, әбден шаршадым, дем алайыншы, кішкене отыра тұрайын.

(Ата малдас құрып отыра кетеді, сол кезде артынан Мыстан кемпір келіп шалды қылқындыра бастайды)

Мыстан: Уһ, бәлем, қолыма түстің бе?

Ата: Ойбай, ойбай жіберші, қылқынып барамын.

Мыстан: Сені жіберсем, сен маған не бересің?

Ата: Бір отар қой беремін.

Мыстан: Жоқ, маған қой керек емес, балаңды бересің.

Ата: Жоқ, бермеймін.

Мыстан: Бермесең мен сені жібермеймін.

Ата: Жарайды, жарайды. Менің Кенжебек деген жалғыз ұлым бар еді, соны ал.

Мыстан: Онда келісемін, оны қалай бересің?

Ата: Баламның жақсы көретін алтын сақасы бар еді, соны саған беріп кетейін, балам алтын сақасын іздеп келгенде өзің ұстап ал. Міне алтын сақа, ал.

(Ата сақаны береді де, өзі кетіп қалады. Мыстан сақаның жанында отырады. Бала сақасын іздеп шығады)

Бала: Апа, апа, анау сақамды алып беріңізші.

Мыстан: Ой, балам, мен отырсам тұра алмаймын, тұрсам отыра алмаймын. Өзің ал.

(Бала еңкейіп сақаны ала бергенде, мыстан оны ұстап алады. Осы кезде қыздар Кенжебекті іздеп шығалы)

Қыздар: Кенжебек, Кенжебек, қайдасың? Біз сені іздеп жүрміз.

(Осы кезде Мыстан атып шығып, қыздарды қорқытады. Қыздар қорқып бірінің артына бірі тығыла бастайды)

Мыстан: Сендерге Кенжебек керек болса, менің шартымды орындаңдар.

Қыздар: Жарайды апа, орындаймыз.

Мыстан: Онда маған Наурыз туралы тақпақ айтып беріңдер.

(Балалар тақпақтарын айтады)