Ар-ұждан және абырой туралы ашық сабақ 6 сынып

Өзiн-өзi тану сабағының жоспары

Мектеп: Т.Тәжібаев атындағы №81 жалпы орта білім беретін мектеп

Мерзiмі: 13.12.2018 жыл

Тақырып: Ар-ұждан және абырой туралы

Сабақ №14

Құндылық: Дұрыс әрекет

Қасиеттер: арлылыққа, адалдыққа, әділдікке тәрбиелеу;

Мұғалiм: Аманкулова Айсулу Сынып: 6 а

Сабақ мақсаты: оқушыларға ар-ұждан және абырой туралы түсінік бере отырып, дұрыс әрекет құндылығының мәнін ашу.

Міндеттері:

- оқушыларға ар-ұждан және абырой туралы түсінік беру;

- оқушыларды ар-ұжданын басшылыққа алып, абыройлы болуға баулу;.

- оқушыларды арлылыққа, адалдыққа, әділдікке тәрбиелеу.

Көрнекіліктер: оқулық, дәптерлер,стикер, ноутбук, бояуыштар, плакат,түрлі түсті суреттер

Сабақ барысы:

Ұйымдастыру кезеңi

Оқушыларды түгелдеу

5Т ережесін еске салу.

5 жұмыс құралын түгендеу: күнделік, оқулық, жұмыс дәптері, қаламсап.

Тыныштық сәтi

«Нұрға бөлену»

Ыңғайланып отырыңдар, денелеріңізді түзу ұстаңыздар. Аяқ-қолыңызды айқастырмаңыз. Қолыңызды тізеңізге немесе столдың үстіне қоюға болады.Көздеріңізді жұмуларыңызды өтінемін.

Елестетіп көріңіз: Күн нұры сіздің төбеңізден өтіп, кеудеңізге қарай бойлап барады. Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді. Балғын және таза әсем гүл сіздің әр ойыңызды, әр сезіміңізді, эмоцияңыз бен тілек қалауыңызды шайып, жүрегіңіздің қауызын ашты.

Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Оймен осы нұрды қолдарыңызға түсіріңіздер. Сіздің қолдарыңыз нұрға бөленіп, сәуле шашуда. Олар сізді тек жақсылық жасау үшін жақсы жерлерге апарады. Олар нұр мен махаббат құралына айналады.

Нұр бірте-бірте қарқындап сіздің денеңізден шығып, жан-жағыңызға сәуле шашады. Осы нұрды туысқандарыңызға, мұғалімдеріңізге, достарыңызға, таныстарыңызға бағыттаңыз. Нұрды уақытша түсініспей, ренжісіп жүрген адамдарға да бағыттаңыз, олардыңда жүрегі нұрға толсын.

Жаймен көзіңізді ашуға болады.

Рахмет!

Үй тапсырмасын тексеру

«Бір билеттің кесірі» Құрманбай Толыбаев әңгімесін оқып түсініп келіп, сұрақтарға жауап береді.

-Жолаушы қария неліктен билетінің табылмағанына қатты абыржыды?

-«Ұят жүрген жерде абырой төгілмейді» деген нақылдың мәні неде ?

-Күнделікті өмірде абыройларыңа нұқсан келмеуін қаншалықты қадағалап жүресіңдер? Әңгімелеп беріңдер.

Дәйексөз

«Ар-ұждан алдындағы адалдық- өз қадір-қасиетіңе , ізгі іс-әрекетіңе байланысты»

Әл-Фараби

-Мақсатқа жету үшін адамның бойында қандай қасиеттер болу керек?

Мұғалім сыйы

Бауыржан Момышұлының «Бақыт» әңгімесінен үзінді беріледі.

Бақыт әркімнің өзіне, өмір сүрген ортасына, жағдайға байланысты. «Бақыттымын» деп паңданып, аяғын еріне басып жүрген көп кісілердің бақытсыз екенін өздері сезбеген. Тарихта дәулетке, атаққа паңданып, мәз болып, өмірін ақымақтықпен өткізгендер аз емес....

Бақыт дегеніміз-өмірді өз орнында, өз қалпында шамасы келгенше үлгілі сүру, адал болу, майдалықтан, іштарлықтан қашық болу. Мұршасы,әлі жеткенінше өз заманын түсіне білу, өз қоғамымен бірге алған мақсатқа қопарыла шын көңілімен адал қызмет істей білу.

Өмірде кедір-бұдыр толып жатыр. Олар әр адым сайын ұшырасады. Олардан именбеу, жасқанбау, азаматтық міндетін қоғам алдында адал ақтай білумен білетін бақыт. Өз қамын ойлағандар толып жатыр. Олардың онысы жәй әурешілік.

Біреу бақытты оттан, біреу судан табады. Күйем-ау, тереңге батып кетем-ау деп қорықпастан барады.

Ар-намысты қорғау-бақыттың шыңы. Қиыншылықтармен санаспастан азаматтық міндетті орындап шығу-ол бақыттың шыңы. Күмәнданып тұрмай, не өлдім, не алдым деп арпалысады. Жеңсең –бақыт.

-Адам қай уақытта өзін бақытты сезінеді?

-Қандай адамды бақытты деп айтуға болды?

-Адам бойындағы қандай қандай құндылықтар оны бақытқа жетелейді?

-Ар-намысты қорғау-бақыттың шыңы дегенді қалай түсінесің?

-Өзіңді қай кезде ерекше бақытты сезінесің? Неліктен?

Шығармашылық жұмыс

4-тапсырма

Төменде берілген сөздер мен сөз тіркестерін пайдаланып, абыройлы адамға мінездеме беріп, оның портретін жасаңдар.

Тиісті сөздер мен сөз тіркестері: ар-ұят, намыс, ізгілік, адалдық, әділдік, шыншылдық, бедел, ізеттілік, азаматтық, көрегендік, көпшілдік, қадір-қасиет.

5-тапсырма

Шәкәрім Құдайбердіұлының өлеңінен үзіндіні оқып, ар-ұят, адалдық туралы түйген ойларыңды сыныптастарыңның пікірімен салыстырып, қорытынды жасаңдар.

6-тапсырма

Оқулықтағы жағдаяттарды талдау

1 - жағдаят

Сен аялдамада тұрсың. Адам көп. Автобус келіп тоқтады, адамдардың барлығы мінуге асықты. Сен де. Есік алдында қысым пайда болды. Сен автобустың ішіне кіріп үлгердің, сол сәтте сенің дәл артыңдағы адамның аяғы тайып, құлайды. Сенің әрекетің...

2 – жағдаят

Сенің көршіңнің отбасында емізулі жас сәби бар. Сәбидің әкесі іссапарда, анасы қатты науқастанып жатыр. Саған дүкенге барып, баланың арнайы тағамын әкеліп беруді өтінді. Алайда саған шұғыл түрде сабаққа бару керек, күрделі бақылау жұмысын тапсыру қажет. Сенің әрекетің...

3- жағдаят

Сен базардан тіс пастасын сатып алдың. Сатушы шатасып үлкен қораптың ішінен 100 мл пастаны алып саған ұсынды. Алайда сен 75 мл пастаға ақша төлеген едің. Сенің әрекетің...

Жаңа ақпарат

Абырой- адам бойындағы ең асыл құндылықтардың бірі, ар-ұят, бедел, құрмет, қадір-қасиет ұғымдарының жиынтығы, адамнның кісілік келбеті, адамгершіліктің тірегі. Абырой қаншалықты биік, әрі ұзақ уақыт бойы тірнектеп жиналғанымен, бір сәтте ғана, сын сағатта шалыс басқан қадамнан оған кесір келуі мүмкін.Сондықтан да ел арасында берілетін батада «Абыройлы бол!» деген қағида орын алған.

Топпен ән айту.

Ринат Зайытовтың өлеңіне жазылған

Ілияс әні «Өмір жайлы»

Бірде жанып шоқтай, бірде сөнеміз.

Бірде құлдай мұңның, бірде төгеміз

Бүгін досты ертең дұшпан көреміз.

Өзгереміз осы, күнде неге біз?!

Қайырмасы:

Өтеді өтпелі замандар

Бәріңнің де бір-бір налың бар.

Жүректің айнасын кірлетпей,

Адал болайықшы, адамдар!

Жақынымыз өссе, ұната алмаймыз.

Қолдан келсе, жардан құлатардаймыз.

Тәкәппар болуды тура таңдаймыз.

Жылатамыз, бірақ жұбата алмаймыз.

Қайырмасы:

Үй тапсырмасы

№15 сабақ. 63-64 бет Мұхтар Құрманалиннің «Серттессең-сөзіңе тұр» үзіндісін оқу

Соңғы тыныштық сәтi

Бүгінгі сабақтан алған әсерлерімізді,ойларымызды

өз жүрегімізге сақтап, жүрек жылуымызды ата-аналарымызға, достарымызға, адамдарға, айналамызға сүйіспеншілікпен іштей оларға жақсы тілектер тілеп, игі істер істейік.

Оқу ісінің меңгерушісі:__________________________

Тексерілді: _______________ «____»___________________

Пән: Өзін – өзі тану

Мектебі: Т.Тәжібаев атындағы №81 жалпы орта білім беретін мектеп

Күні: 13.12.2018ж №: 14-сабақ

Сыныбы: 6 а

Тақырыбы: Ар – ұждан және абырой туралы

Құндылығы: Дұрыс әрекет

Қасиеттері: Отбасындағы, мектептегі парызын орындау, әдепті болу, әділеттілік.

Пән мұғалімі:Амакулова Айсулу Нурмахановна

Сабақтың Мақсаты: оқушыларға ар-ұждан және абырой туралы түсінік бере отырып,дұрыс әрекет құндылығының мәнін ашу.

Міндеттері: