Арулар – асыл жандар салтанатты кеш сценарийі

«Арулар – асыл жандар» салтанатты кеш сценарийі

Мақсаты: 8 наурыз – халықаралық әйелдер күні мерекесіне орай ұстаз-аналарды, аруларды құттықтау, мерекелік көңіл-күй сыйлау

Өтетін орны: мектеп акт залы

Өтетін уақыты: 7.03.2019

Уақыты: 12:00

Жауаптылар: мектептің мұғалім жігіттері, «Сахна сыры» үйірмесі және оқушы ұлдар

Жүргізушілер: Досат Дәрібекұлы, Асылбек Балғабай

Фанфар ойнайды, екі жүргізуші сахнаға шығады

1-жүргізуші: Арулар – асыл жандар, құрметтілер,

Көктеммен өзін-өзі бір деп білер.

Сөз жетпес сұлулықпен, жылылықпен

Өмірді өрнектеуге міндеттілер,

2-жүргізуші: Арулар – аяулылар, ардақтылар,

Өмірге жылу болып қалмақ бұлар.

Арулар – тіршілікке күретамыр

Өмірді бір-біріне жалғап тұрар.

1-жүргізуші: Қайырлы күн, ұлт пен ұрпақты әлдилеген қадірлі ұстаз-аналар!

2-жүргізуші: Армысыздар, гүл-көктемнің символындай қымбатты арулар!

1-жүргізуші: Өздеріңіздің құрметіңізге арналған «Арулар – асыл жандар» атты мерекелік кешімізге

Қош келдіңІздер! (1,2-жүргізуші бірге)

2-жүргізуші: Сіздерді көктем мезгілінің әдемі мейрамы 8 наурыз – Халықаралық әйелдер күні мерекесімен шын жүректен

құттықтаймыз! (1, 2-жүргізуші бірге)

1-жүргізуші: Олай болса, мерекемен құттықтау үшін сөз мектеп директоры Гүлзада Енсегенқызына беріледі (сөйлейді және алғыс хаттар табысталады, алғыс мәтінін жүргізуші оқиды.)

Марапат иелері, сахнада қалуыңызды сұраймыз. Естелік суретке түсіріп алсын! Алғысқа бөлене беріңіздер, әріптестер! (Соңғы марапат тапсырылған соң 9 мұғалім директормен суретке түседі)

2-жүргізуші: Марапат құтты болсын, ұстаздар!

1-жүргізуші: «Мұрагер» мектеп ансамбльінің жас буыны алғаш рет сіздердің алдарыңызда өнер көрсетеді. Қарсы алыңыздар! («Ерке сылқым» және «Айжан қыз» күйлері орындалады, орындаушылар орындықтарын өздері алып, сахнадан шығып кетеді)

2-жүргізуші: Арманыңды ақтармын ба жүрегімде тербесем,

Айға сіңлі, қарындассың қасиетті Жерге сен,

Мен өзіңді теңдесі жоқ құдірет деп түсінем,

Сендік қуат мың есе артық Жердің тату күшінен.

1-жүргізуші: Сұлу әлем, әлем сұлу сен жаратқан адаммен,

Көк жолының қарсылығын қағып тастап барам мен.

Сендік қуат болар, бәлкім, басын иді көк маған,

Әркез сенен туғанымды есіме алсам тоқтаман.

Қандай тамаша өлең жолдары десеңші! Ананың құдіретін, ананың қадірін осы өлеңнен асырып жеткізе алмаспыз. Ал, осындай ойлы дүниенің авторы кім екенін білесің бе, Асылбек?