Әскери саладағы мемлекеттік тілдің маңызы туралы мақала

Әскери саладағы мемлекеттік тілдің маңызы

Тіл – мемлекеттің тұғырлы тірегі, халықтың рухани байлығы, өткені мен болашағының айқын көрінісі. Тіл мен тәуелсіздік – егіз ұғым. Осынау тәуелсіздігіміздің тұғыры бекіп, еліміз еңсесін көтерген тұста мемлекеттік тілдің мәртебесі үшін біраз ауқымды істердің атқарылғаны анық. Бүгінгі таңда мемлекеттік тілдің дамуына жан-жақты қолдау көрсетіліп, қажеттілік артып келеді.

Шымкент қалалық тілдерді оқыту-әдістемелік орталығы мемлекеттік тілді оқыту қызметін жүзеге асыруда қаладағы мекемелер мен ұйымдар, кәсіпорындармен тығыз байланыста жұмыс істейді.

Осыған орай Қазақстан Республикасы Ұлттық ұланы «Оңтүстік» өңірлік қолбасшылығына қарасты Шымкент қаласындағы 6506 әскери бөлімінде қазіргі уақытта тіл мәселесі төңірегінде жүзеге асқан жұмыстарға тоқталып өтсем. Қазіргі уақытта әскери бөлімде қазақ тілін А2 базалық және В2 ортадан жоғары деңгейлерде оқыту сабақтарын жүргіземін. Бүгінгі таңда әскери саласындағы мамандар қазақ тілінің одан әрі кең өріс алып, қанатын кеңге жайып, тілдік ортаның қалыптасуына мүдделі. Сарбаздардың рухын көтеріп, бойларында ержүрек батырлық қасиеттерін тәрбиелеуде тіліміздің атқаратын рөлі аса зор. Өзге ұлт өкілдерінің қазақ тілін білуге деген құлшыныстары да артып келеді.

Маусым айында Шымкент қалалық тілдерді оқыту-әдістемелік орталығы Қазақстан Республикасында тіл саясатын дамытудың 2023 – 2029 жылдарға арналған тұжырымдамасын іске асыру жөніндегі іс-қимыл жоспарына сәйкес және орталықтың 2024 жылға арналған жұмыс жоспарын іске асыру, мемлекеттік тілдің қолдану аясын кеңейту, тіл мәдениетін көтеру мақсатында «Жарнама – тіл тазалығының көрінісі» қалалық байқауын өткізді. Байқау қорытындысы бойынша бас жүлдені 6506 әскери бөлімінің тілші-ұйымдастырушы офицері капитан Олжас Адильбек иеленіп бағалы сыйлықтармен марапатталды.

Әскер – ел қорғаны. Сарбаз елін қорғау үшін рухты болуы керек. Ал рухты болуы үшін өз ана тілінің қадірін білуі керек. Осы мақсатта бөлімдегі мерзімді қызметтегі әскери қызметшілермен апта сайын қазақ халқының ұлы ақындары мен жазушыларының мерейтойларына орай әдеби, тақырыптық кештер, ауызша журнал, викториналар және т.б. танымдық іс-шаралар өткізіліп тұрады. Сонымен қатар әскери қызметшілер ҚАЗТЕСТ жүйесі бойынша қазақ тілін білу деңгейін анықтаудың ұдайы жүргізілетін тестілеу жұмыстарына белсенді қатысады.