Мемлекеттік тілдің өзектілігі туралы қазақ тілі мақаласы

Мемлекеттік тіл өзектілігі

«Ұлттың тілі – ұлттың ділі» демекші, қандай ұлт пен ұлыс болмасын ең басты байлығы – ана тілі. Тілін жоғалтқан халықтың жеке мемлекет болып басқа елдермен терезесі тең дәрежеде тұра алмайтындығы тарихтан белгілі. Сондықтан сан ғасырлар бойы арман болған тәуелсіздігімізге қол жеткізіп, егеменді ел болып жатқан сындарлы кезеңде мемлекетіміздің нышаны ана тілімізді бүкіл тіршілігіміздің түп қазығына айналдыру – әрбір ұлтжанды азаматтың басты міндеті.

Әрбір халықтың ана тілі бар десек, өз ана тіліміздің барша болмысы, тіпті оның әрбір дыбысы мен жалғау-жұрнағы әрбір шынайы азаматқа танымал, мәдени-әлеуметтік өмірде өзіндік мәні бар киелі ұғым. Халқымыздың біртуар перзенті Мағжан Жұмабаев: «...Ұлттың ұлт болуы үшін бірінші шарт – тілі болуы. Ұлттың тілінің кеми бастауы ұлттың құри бастағанын көрсетеді. Ұлтқа тілінен қымбат ешнәрсе болмасқа тиіс. Бір ұлттың тілінде сол ұлттың сыры, тарихы, мінезі айнадай көрініп тұрады. Қазақтың тілінде қазақтың сары сайран даласы, біресе желсіз түндей тымық, біресе құйындай екпінді тарихы, сар далада үдере көшкен тұрмысы, асықпайтын, саспайтын сабырлы мінезі – бәрі көрініп тұр. Қазақтың сары даласы кең, тілі бай.

Қыркүйек айының бірінші аптасында Қазақстан халқының Тілдері мерекесіне арналған онкүндік өткізілді. Бұл еліміздің барлық жерінде аталып өтетін үлкен мереке. Біздің ауданымызда да тілдер онкүндігінің іс-шаралары өз деңгейінде аталып өтті. Ана тіліміздің мерейі үстем болып, болашағы жарқын болуына Тілдерді оқыту орталығының ұжымы аянбай еңбек етіп келеді. Біздің Орталық оқытушылары мемлекеттік тілді оқытумен қатар, оның қолданылу аясын кеңейту, маңызын насихаттау, оны оқып-үйренуге деген ынта-ықыласты арттыру мақсатында көптеген жұмыстар атқарады. Соның бірі оқу жылының басымен қатарласа келетін Тілдер мерекесіне арналған іс шаралар, атап айтатын болсақ биыл бейне құттықтаулар, дөңгелек үстел, ашық сабақ, интеллектуалдық-танымдық ойын сабағы және сауатты жарнама жасауға көмек ретінде ашық есік күні өткізілді. Бұл іс-шаралар ұжымның шеберлігінің арқасында өте қызықты да тартымды болып өтті және ашық сабақтар тыңдаушыларға да өте үлкен әсер қалдырды.